პოლიტიკა

ჩვენ მხარს ვუჭერთ საქართველოს ხალხს, სუვერენიტეტს და ევროპულ პერსპექტივას, მაგრამ ჩვენ ასევე უნდა ვუპასუხოთ რეპრესიებს, რომლებიც საქართველოში მიმდინარეობდა, ესაა სანქციების მიზეზი - არტურ გებალი

მე შემიძლია დავადასტურო რვა პირის წინააღმდეგ დაწესებული სანქციები, ეს გადაწყვეტილება მიღებული იყო იმ ფაქტის გათვალისწინებით, რომ იყო არაერთი რეპრესია საქართველოში, რაც დადასტურდა, ჩვენ ძირითადად დავაწესეთ შემზღუდავი ზომები იმ ადამიანების წინააღმდეგ, რომლებიც, როგორც ჩვენ გვესმის, არიან ამ რეპრესიები უკან, – ამის შესახებ პოლონეთის საელჩოს ხელმძღვანელმა, არტურ გებალმა განაცხადა.

მისი თქმით, პოლონეთი ამ კუთხით იზოლირებული არ არის და კიდევ ბევრი ქვეყანა არსებობს, მათ შორის ევროკავშირში, რომლებმაც მსგავსი ნაბიჯი გადადგეს.

„პოლონეთი უერთდება ამ ქვეყნებს. ეს სანქციები არის იმ ხალხის წინააღმდეგ, ვინც უშუალოდაა პასუხისმგებელი რეპრესიებზე. შეიძლება თუ არა, რომ ეს სანქციები გაფართოვდეს? რა თქმა უნდა, ეს ყველაფერი დამოკიდებულია საქართველოში არსებულ სიტუაციაზე. თუ მსგავსი რამ კიდევ მოხდება, მაშინ, დიახ, ჩვენ ამას უნდა შევხედოთ. როგორც ჩემმა მინისტრმა თქვა საჯაროდ, ჩვენ გვესმის, რომ ეს არ არის ქართველი ერის არჩევანი და ჩვენც არ ვართ ქართველი ერის წინააღმდეგ. ჩვენ მხარს ვუჭერთ საქართველოს ხალხს, სუვერენიტეტს და საქართველოს ევროპულ პერსპექტივას, მაგრამ ჩვენ ასევე უნდა ვუპასუხოთ რეპრესიებს, რომლებიც საქართველოში მიმდინარეობდა. ესაა სანქციების მიზეზი“, – განაცხადა გებალმა.

ამასთან, პოლონეთის საელჩოს ხელმძღვანელს კითხვა დაუსვეს, თუ რატომ არ დაპატიჟეს საქართველო ვარშავაში.

„ეს იყო შედეგი საქართველოს გადაწყვეტილებას, რომელიც მიღებული იყო 28 ნოემბერს, ამ დღეს საქართველოს პრემიერ-მინისტრმა საჯაროდ განაცხადა, რომ საქართველო გაყინავს მოლაპარაკებებს ევროკავშირში გაწევრიანების შესახებ, ვარშავაში კი გაიმართა შეხვედრა გაფართოების პროცესის მონაწილე ქვეყნებთან, რომლებიც აპირებენ გაფართოებაში მონაწილეობას და მათ არ გაუყინავთ გაფართოების პროცესები. ამიტომ იყო ვარშავაში საქართველოს ადგილი ცარიელი, მაგრამ აქვე მინდა, დაგიდასტუროთ, რომ ჩვენ ღია ვართ, რომ საქართველო დაბრუნდეს ევროპის გზაზე. პოლონეთი არის ევროკავშირის საბჭოს თავმჯდომარე ქვეყანა ამჟამად. გაფართოება არის პოლონეთის ერთ-ერთო პრიორიტეტი. პოლონეთი იყო და ყოველთვის იქნება საქართველოს მხარდამჭერი ამ ძალისხმევაში. ასე რომ, ჩვენ ველოდებით საქართველოს დაბრუნებას მოლაპარაკებებთან, რომ საქართველომ შეასრულოს პირობები. პირობები ყველა ქვეყანამ უნდა შეასრულოს, ასე იყო ჩემი ქვეყნის შემთხვევაშიც, როდესაც ჩვენ ევროკავშირში გაწევრიანებას ვახდენდით. ასე რომ, პოლონეთი დაუჭერს ამას მხარს იმდენად, რამდენადაც ეს შესაძლებელია“,- განაცხადა გებალმა.

წყარო