პოლიტიკა

ჩვენ კიდევ ვცდილობთ, გადავდგათ ნაბიჯები, რათა ბოლომდე შეთანხმდეს ტექსტი, თუმცა ამ მიმართებით ცოტა სკეპტიკურად ვარ განწყობილი - გია ვოლსკი

პარლამენტის ვიცე-სპიკერის, გია ვოლსკის განცხადებით, არჩილ ტატუნაშვილის დაღუპვასთან დაკავშირებული რეზოლუცია შედეგზე უნდა იყოს ორიენტირებული.

ვოლსკის თქმით, ოპოზიციასა და უმრავლესობას შორის მიმდინარე კონსულტაციების მიმართ ის სკეპტიკურადაა განწყობილი.

„ტექსტი უნდა იყოს ისეთი, რომ არ იყოს რაღაც ფუჭი გასროლასავით, უნდა იყოს საქმიანი, შედეგზე ორიენტირებული და ჩვენი პოზიციის გამომხატველი შექმნილ ვითარებასთან დაკავშირებით და არა მარტო კონკრეტულ საკითხებთან მიმართებაში. აქედან გამომდინარეობს ის, რომ ჩვენ კიდევ ვცდილობთ, გადავდგათ ნაბიჯები, რათა ბოლომდე შეთანხმდეს ტექსტი, თუმცა ამ მიმართებით ცოტა სკეპტიკურად ვარ განწყობილი", - განაცხადა ვოლსკიმ.

დეპუტატის შეფასებით, სანქციებთან დაკავშირებით გონივრული მიდგომაა საჭირო.

„ჩვენ ვიცით, რომ მსოფლიოს დამოკიდებულება რუსეთის მიმართ მნიშვნელოვანწილად განისაზღვრება იმ ფაქტორითაც, რაც შეეხება საქართველოსა და საქართველო-რუსეთის ურთიერთობებს. ასე რომ, ამ საკითხთან ზედმეტი განცხადებები და პათოსი აბსოლუტურად არ შეესაბამება რეალობას. რეალობა არის ის, რომ ვითარება საკმაოდ დაძაბულია, ფეთქებადსაშიშია და მსოფლიოში მიმდინარე დაპირისპირების პროცესის ნაწილია საქართველოში არსებული ვითარება. ამას უნდა შეფასება და გონივრული მიდგომა. ვფიქრობ, მთავრობას სწორი პოზიცია და სტრატეგია აქვს", - განაცხადა ვოლსკიმ.

ის ასევე მიესალმა საოკუპაციო ძალების მიერ 22 თებერვალს დაკავებული ლევან ქუტაშვილისა და იოსებ პავლიაშვილის დაბრუნებას თბილისის მიერ კონტროლირებად ტერიტორიაზე.

ცნობისთვის, პარლამენტში წარდგენილია უმრავლესობისა და ოპოზიციის რეზოლუციები არჩილ ტატუნაშვილის დაღუპვასთან დაკავშირებით. უმრავლესობა საერთაშორისო საზოგადოებას მოუწოდებს, ჩაერთოს ტატუნაშვილის საქმის გამოძიებაში, ხოლო ოპოზიცია ითხოვს „ტატუნაშვილი-ოთხოზორიას“ სიის შექმნასა და სანქციების დაწესებას. სწორედ ამ დოკუმენტების ერთიანი ვერსიის შესახებ მიმდინარეობს კონსულტაციები.