პოლიტიკა

ჩვენ გადავდივართ სრულად საპარლამენტო მმართველობაზე, რომელიც არის საყოველთაოდ აღიარებული, როგორც ყველაზე დემოკრატიული - ირაკლი კობახიძე

პარლამენტის თავმჯდომარემ ირაკლი კობახიძემ საქართველოს კონსტიტუციის ახალ რედაქციაზე საუბრისას განაცხადა, რომ ქვეყანა სრულად საპარლამენტო მმართველობაზე გადადის. კობახიძის მტკიცებით, მმართველობის ეს ფორმა საყოველთაოდაა აღიარებული, როგორც ყველაზე დემოკრატიული.

ირაკლი კობახიძემ ასევე ხაზი გაუსვა 2020 წლიდან პროპორციული საარჩევნო სისტემის ამოქმედებასა და პრეზიდენტის არაპირდაპირი არჩევის წესს.

„ჩვენ გადავდივართ სრულად საპარლამენტო მმართველობაზე, რომელიც არის საყოველთაოდ აღიარებული, როგორც ყველაზე დემოკრატიული მმართველობის ფორმა და როგორც მოგეხსენებათ, ასევე, 2020 წლიდან ამოქმედდება პროპორციული საარჩევნო სისტემა. ეს არის ძალიან მნიშვნელოვანი ცვლილება. ასევე, შემოღებული იქნება პრეზიდენტის არაპირდაპირი არჩევის წესი, რაც იქნება ასევე ძალიან მნიშვნელოვანი ცვლილება.

თქვენ ნახეთ, რა პროგნოზს ვაკეთებდით ჩვენ, რომ არ არის თავსებადი პრეზიდენტის პირდაპირი არჩევნები საპარლამენტო მმართველობასთან და ამის საუკეთესო დასტური იყო ეს საპრეზიდენტო არჩევნები, გამომდინარე იქიდან, რომ საპრეზიდენტო კანდიდატები ვერ გამოდიოდნენ პროგრამებითა და რეალური დაპირებებით. მათ, ხშირ შემთხვევაში, უწევდათ ტყუილი დაპირებების გაცემა და ამის არაერთი მაგალითი ვიხილეთ და ასევე, კონცენტრირებული იყო ეს არჩევნები მთლიანად პიროვნულ თავდასხმებზე, შეურაცხყოფაზე, აგრესიაზე და ეს იყო იმ ნონსენსის გამოძახილი, რასაც ჰქვია საპარლამენტო მმართველობაში პირდაპირი საპრეზიდენტო არჩევნების ჩატარება. ეს არის არასწორი და ძალიან კარგია, რომ პრეზიდენტის შემდეგი არჩევნები ჩატარდება უკვე არაპირდაპირი წესით",- განაცხადა კობახიძემ.