პოლიტიკა

ჩვენ დავეხმარებით საკონსტიტუციო კომისისას - გიორგი აბაშიშვილი

პრეზიდენტის ადმინისტრაციის ხელმძღვანელი გიორგი აბაშიშვილი გამოეხმაურა პოლიტიკური სპექტრის წევრების განცხადებებს, პრეზიდენტის ინიციატივაზე საკონსტიტუციო ცვლილებების საჯარო განხილვის შესახებ.

აბაშიშვილის თქმით, პრეზიდენტის კამპანია ხელს კი არ შეუშლის საკონსტიტუციო კომისიის მუშაობას, არამედ დაეხმარება მას.

„ჩვენ ჩავალთ ყველგან, აბსოლუტურად ყველა ქალაქში, სხვადასხვა ფორმატში შევხდებით საქართველოს მოქალაქეებს, ჩვენთან იქნებიან საკონსტიტუციო კომისიის წევრებიც, რომლებსაც შეეძლებათ, შემდგომში დააფიქსირონ თავიანთი აზრი საკონსტიტუციო კომისიის მიმდინარეობის პროცესში. მას შემდეგ, რაც საკონსტიტუციო კომისია შექმნის დოკუმენტის საკუთარ ვერსიას და დაიწყებს საერთო სახალხო განხილვებს, ჩვენ დავეხმარებით საკონსტიტუციო კომისისას, ამ შეხვედრების ტექნიკურ და შინაარსობრივ ორგანიზებაში, გამომდინარე იქიდან, რომ ჩვენ უკვე ბევრი სამუშაო გვექნება განხორციელებული“, - განაცხადა აბაშიშვილმა.

შეგახსენებთ, რომ გუშინ საქართველოს პრეზიდენტმა გიორგი მარგველაშვილმა დაიწყო კამპანია „კონსტიტუცია ყველასია“, რომლის მიზანია ხალხის ჩართულობა და მონაწილეობა კონსტიტუციის შექმნის პროცესში, ასევე ამ კუთხით საზოგადოებაში ცნობიერების ამაღლება.

ანა მებურიშვილი