პოლიტიკა

ჩვენ არ ვცნობით წულუკიანის ფარსს, რომელმაც საბოლოოდ, ეს ე.წ. საგამოძიებო კომისია გამოიყენა იმისთვის, რომ ხაფანგში მოაქციოს ოპოზიცია და აიძულოს უკან დახევა - თენგო თევზაძე

„კოალიცია ცვლილებისთვის“ და პარტია „ახალი“ არ აპირებს უკან დახევას, არ აპირებს თანამშშრომლობას რეჟიმთან და არ აპირებს ადგილობრივი თვითმმართველობის არჩევნებში მონაწილეობას, - ამის შესახებ „კოალიცია ცვლილებისთვის“ წევრმა, თენგო თევზაძემ პარტიის ოფისში გამართულ პრესკონფერენციაზე განაცხადა.

„გუშინ ივანიშვილის რეჟიმის ე.წ. პარლამენტმა მეორედ დაიბარა პოლიტპატიმარი ნიკა გვარამია ე.წ. საგამოძიებო კომისიაზე. პარტია „ახალის“ და „კოალიცია ცვლილებისთვის“ ლიდერების პოზიცია აღნიშნულთან დაკავშირებით ცხადია - ისინი ამისთვის იმყოფებიან სასჯელაღსრულების დაწესებულებაში. ნიკა გვარამია და პარტია „ახალი“ არ აპირებს ითანამშრომლოს ივანიშვილის რეჟიმთან. ჩვენი პირობები არის იგივე, რა პირობაც აქვს პროტესტს - ახალი საპარლამენტო არჩევნები და პოლიტპატიმრების გათავისუფლება. არც ნიკა გვარამია და არც „ახალის“, ასევე, არც „კოალიცია ცვლილებისთვის“ წევრები აპირებენ ითანამშრომლონ რეჟიმთან და ლეგიტიმაცია მიანიჭონ რეჟიმს. ჩვენ არ ვცნობით წულუკიანის ფარსს, რომელმაც საბოლოოდ, ეს ე.წ. საგამოძიებო კომისია გამოიყენა იმისთვის, რომ ხაფანგში მოაქციოს ოპოზიცია და აიძულოს უკან დახევა. „კოალიცია ცვლილებისთვის“ და პარტია „ახალი“ არ აპირებს უკან დახევას, არ აპირებს თანამშშრომლობას რეჟიმთან და არ აპირებს ადგილობრივი თვითმმართველობის არჩევნებში მონაწილეობას“, - განაცხადა თენგო თევზაძემ.

ცნობისთვის, პარლამენტმა დროებით საგამოძიებო კომისიაზე გამოცხადების მოთხოვნით ნიკა გვარამიას მეორედ მიმართა. ნიკა გვარამიას პირველად დაბარებისას, სხდომაზე გამოუცხადებლობის გამო, აღკვეთის ღონისძიების სახით პატიმრობა აქვს შეფარდებული.