პოლიტიკა

ჩვენ არ ვიყიდებით - სალომე ზურაბიშვილი ტრამპის მუქარაზე

„ჩვენ არ ვიყიდებით“, - ასე გამოეხმაურა პარლამენტის დამოუკიდებელი დეპუტატი სალომე ზურაბიშვილი აშშ-ის პრეზიდენტის, დონალდ ტრამპის განცხადებას. ტრამპი იმ ქვეყნებს დაემუქრა დაფინანსების შეწყვეტით, რომლებიც არ დაუჭერენ მხარს თეთრი სახლის გადაწყვეტილებას იერუსალიმთან დაკავშირებით.

ხუთშაბათისთვის დაგეგმილი გაეროს გენერალური ასამბლეის საგანგებო სხდომაზე უნდა განიხილონ რეზოლუცია, რომელიც აკრიტიკებს აშშ-ის პოზიციას იერუსალიმზე.

ზურაბიშვილმა აღნიშნა, რომ საქართველოს საბოლოო პოზიციაზე მსჯელობაა საჭირო, ხოლო აშშ-ის მხრიდან საკითხის ასეთი დაყენება მართებული არაა.

„მე მიმაჩნია, რომ ჩვენ ერთი ქვეყნის მუქარებს ჩამოვშორდით და მეორე ქვეყნის მუქარებს არ უნდა დავექვემდებაროთ. რა პოზიცია უნდა დაიჭიროს საქართველომ ამ შემთხვევაში, ეს სხვა თემაა და ამაზე შეიძლება მსჯელობა. მე ამაზე პოზიციის დაფიქსირებისგან თავს შევიკავებ, თუმცა რაც შეეხება მსგავსი ფორმით საკითხის დაყენებას, არ არის სწორი. ჩვენ არ ვიყიდებით“, -თქვა ზურაბიშვილმა.

დეკემბრის დასაწყისში დონალდ ტრამპმა იერუსალიმი ისრაელის დედაქალაქად გამოაცხადა, რასაც დასავლელი პარტნიორებისა და ისლამური და არაბული ქვეყნების უკმაყოფილება მოჰყვა.

ანა მებურიშვილი