პოლიტიკა

ჩვენ არ შევეგუებით, რომ საქართველო უნდა იქცეს შპს ივანიშვილის დიქტატურად - ირაკლი ფავლენიშვილი

2003 წლიდან 2012 წლამდე იყო რეფორმების, წარმატების პერიოდი და ისტორიის გადაწერა ვერ მოხერხდება, – ამის შესახებ „ნაციონალური მოძრაობის“ წევრმა, ირაკლი ფავლენიშვილმა განაცხადა.

მისივე თქმით, „პარლამენტის ე.წ. კომისიის მიზანია „ნაციონალური მოძრაობის“ აკრძალვა, საქართველოს სუვერენიტეტისა და ტერიტორიული მთლიანობის შელახვა“.

„რა თქმა უნდა, ჩვენ ვსაუბრობთ ღალატის კომისიაზე, რომელიც აკეთებს იმას, რაც წარუმატებლობისთვის არის განწირული. სინამდვილეში ქართულმა საზოგადოებამ, მათ შორის, საერთაშორისო საზოგადოებამ, ძალიან კარგად იცის, რომ 2003 წლიდან 2012 წლამდე იყო „ვარდების რევოლუციის“ შემდგომი რეფორმების, წარმატების, ინსტიტუციების მშენებლობის პერიოდი და ვერანაირი რუსული პროპაგანდისტული კლიშეების დანერგვა, ისტორიის გადაწერა ვერ მოხერხდება. ეგრეთ წოდებული კომისიის, სინამდვილეში, ღალატის კომისიის მიზანი, მათ შორის იყო საქართველოს სუვერენიტეტისა და ტერიტორიული მთლიანობის შელახვა, რუსებისთვის სალაპარაკოს მიცემა, თითქოს მათ ბარბაროსულ აგრესიაში მარტო მათი ბრალეულობა კი არ იყო, არამედ ქართველი ხალხის, სახელმწიფოს ბრალეულობაც.

ძალიან რეალურია ჩვენი, ყველას დაპატიმრება, აკრძალვა, განადგურება ყველა სამოქალაქო პოლიტიკური უფლების. ამას ვუყურებთ ბოლო თვეების მანძილზე, 29 აპრილს ამის შესახებ ღიად ისაუბრა ივანიშვილმა და ყველა არასამთავრობო ორგანიზაციის, მედიასაშუალების, ოპოზიციური პარტიის გაუქმება, განადგურება დააანონსა. ქართველი ხალხი ემზადება გადამწყვეტი ბრძოლისთვის, მათ შორის, 4 ოქტომბერს. ჩვენ არ შევეგუებით, რომ საქართველო უნდა იქცეს შპს ივანიშვილის დიქტატურად. ნიშანდობლივია ის ფაქტი, რომ ადამიანები 13 წლის შემდეგ თითქოს იძიებენ საქმეს. ნება და კონკრეტული შესაძლებლობა რომ არსებულიყო, ამას იზამდნენ 13 წლით ადრე. უბრალოდ, ახლა დასჭირდათ ბოლომდე მიყვანა, რათა გააფორმონ დიქტატურა. რაც შეეხება დანაშაულებს, ეს ხალხი დანაშაულებზე როცა საუბრობს, არასდროს ყოფილა საკითხი დასმული, სად არიან,მაგალითად, ის პროკურორები, პოლიციელები, ადამიანები, რომლებიც ჩართული იყვნენ? მიხეილ სააკაშვილი ხომ არ დადიოდა ან სხვა რომელიმე მაღალი პოლიტიკური თანამდებობის პირი? სად არის პოლიციელი და პროკურორი, რომელიც რომელიმე დარღვევას ჩადიოდა, რაზეც კომისიის ფარგლებში იყო საუბარი? რატომ არ არის ამაზე საუბარი? ანუ, მათივე „ქოცური“ ლოგიკით, შეუძლიათ, დანაშაული ჩაიდინონ და ამდენი წლის შემდეგ არ შეეხებიან, უბრალოდ ამ დანაშაულებზე ისაუბრებენ. მაღალი პოლიტიკური თანამდებობის მქონე პირებს, შეიძლება, საერთოდ არ ჰქონოდათ შეხება კონკრეტულ ფაქტებთან. კარგად გვესმის, რომ კონკრეტული გადაცდომები შეიძლება მოხდეს ნებისმიერი ხელისუფლების დროს ნებისმიერ ქვეყანაში. მაინცდამაინც მათკენ რომ იშვერენ ხელს, არცერთი მაგალითი არ ყოფილა ამ კომისიის ფარგლებში, რომ კონკრეტულ პროკურორზე, პოლიციელზე, მოსამართლეზე ყოფილიყო საუბარი. ეს აჩვენებს, სინამდვილეში რა არის ამ ეგრეთ წოდებული კომისიის მიზანი“, – განაცხადა ფავლენიშვილმა.