პოლიტიკა

ჩვენ აქ ვართ ოპონირებისთვის და საპარლამენტო უმრავლესობის ნაცვლად ამ კვორუმს არ შევავსებთ - ოთარ კახიძე

„ევროპული საქართველოს“ წევრმა ოთარ კახიძემ პარლამენტის პლენარული სხდომის გადადებაზე საუბრისას განაცხადა, რომ ოპოზიცია საპარლამენტო უმრავლესობის ნაცვლად კვორუმს არ შეავსებს. მისი განმარტებით, ამ ქმედებით ოპოზიციამ საზოგადოებას დაანახა საპარლამენტო უმრავლესობის დამოკიდებულება სახელმწიფო ბიუჯეტის მიმართ.

„ქართულ ოცნებას“ 122 დეპუტატი ჰყავს საქართველოს პარლამენტში. რაც შეეხება კვორუმს, კვორუმი არის 76. ქვეყნის მთავარი ფინანსური დოკუმენტის განხილვაზე, რომელზეც ისინი არიან პასუხისმგებელნი და რომელიც მათი მთავრობის მომზადებულია, არ ჩამოდიან პარლამენტში.

რაც შეეხება ოპოზიციას, ჩვენ აქ ვართ ოპონირებისთვის და მათ პასუხისმგებლობას არ გავიზიარებთ და მათ ნაცვლად ამ კვორუმს არ შევავსებთ. რა თქმა უნდა, მნიშვნელოვანია საზოგადოებამ დაინახოს, თუ როგორია ხელისუფლების დამოკიდებულება სახელმწიფოს ბიუჯეტის მიმართ“, - განაცხადა კახიძემ.

ცნობისთვის, პარლამენტის პლენარული სხდომა კვორუმის უქონლობის გამო, 16:00 საათამდე გადაიდო.