სამართალი

ჩემთვის გაუგებარია, რა დავაშავე - გიორგი ბაჩიაშვილი

ჩემთვის გაუგებარია, რა დავაშავე, - ამის შესახებ „თანაინვესტირების ფონდის“ ყოფილმა ხელმძღვანელმა გიორგი ბაჩიაშვილმა სასამართლო პროცესზე განაცხადა.

"რაში ვიყავი გულგრილი, რამაც მძიმე შედეგი გამოიწვია? მეორე მუხლი - სახელმწიფოს რა ზიანი გამოიწვია - კერძო პროექტი იყო. ბატონო მოსამართლე, პროკურორო, განმიმარტეთ, რატომ ვზივარ ამ დარბაზში, რატომ ვიმყოფები აქ?",- განაცხადა ბაჩიაშვილმა.

მსჯავრდებულ გიორგი ბაჩიაშვილის საქმე, რომელიც „მტკვარი ჰესს" უკავშირდება, არსებითად განსახილველად სასამართლოს გადაეცა.

დღევანდელ პროცესზე ასევე, მტკიცებულებების დასაშვებობაზე იმსჯელეს.

სხდომას ესწრებოდა თავად ბაჩიაშვილი.

შემდეგი სასამართლო პროცესი 18 ნოემბერს, 12:00 საათზე გაიმართება.

ცნობისთვის, გიორგი ბაჩიაშვილს "მტკვარი ჰესის" საქმეზე ბრალდება საქართველოს სსკ-ის 2201-ე მუხლის მე-2 ნაწილით აქვს წარდგენილი, რაც სპეციალური უფლებამოსილების მქონე პირის მიერ სამსახურებრივი მოვალეობის შეუსრულებლობას ან არაჯეროვნად შესრულებას გულისხმობს, რამაც მძიმე შედეგი გამოიწვია. წარდგენილი ბრალდება სასჯელის სახედ და ზომად 2-დან 5- წლამდე თავისუფლების აღკვეთას ითვალისწინებს.

ამასთან, გიორგი ბაჩიაშვილი მსჯავრდებულია „ქართული ოცნების“ დამფუძნებლის, ბიძინა ივანიშვილის კრიპტოვალუტის მითვისებაშია. მას ამ საქმეზე 11 წლით თავისუფლების აღკვეთა აქვს მისჯილი.

ბაჩიაშვილი მსჯავრდებულია კიდევ ერთ საქმეზე, რომელიც სახელმწიფო საზღვრის უკანონოდ გადაკვეთას გულისხმობს. მას სასჯელის სახით 4 წლითა და 6 თვის ვადით აქვს თავისუფლების აღკვეთა მისჯილი.