პოლიტიკა

ჩემთვის და ჩემი მეგობრებისთვის მიუღებელია „ნაციონალურ მოძრაობასთან“ ერთად მუშაობა და ვტოვებთ „ევროპულ საქართველოს“ - ირაკლი ღურწკაია

„ევროპული საქართველო“ ზუგდიდის საკრებულოს წევრმა ირაკლი ღურწკაიამ დატოვა. როგორც მან პირველ არხს განუცხადა, მისთვის მიუღებელია „ნაციონალური მოძრაობის“ მხარდაჭერა, რომელიც მისი თქმით, ახალაიების, ქარდავებისა და სხვების შეწყალებასა და რეინკარნაციას აპირებს.

ღურწკაიას მტკიცებით, მან თავად, ყოველგვარი ზეწოლის გარეშე მიიღო ეს გადაწყვეტილება.

„ჩემთვის ცნობილი იყო, რომ „ევროპულ საქართველოს“ არანაირი კავშირი აღარ ჰქონდა „ნაციონალურ მოძრაობასთან“, მაგრამ ყველაფერს ფარდა აეხადა. ჩემთვის და ჩემი მეგობრებისთვის მიუღებელია „ნაციონალურ მოძრაობასთან“ ერთად მუშაობა და ვტოვებთ „ევროპულ საქართველოს“. ეს არის ჩემი და ჩემი მეგობრების გადაწყვეტილება“, – აღნიშნა ღურწკაია.

მისი თქმით, ის არცერთ სხვა პარტიაში არ გადადის.

ღურწკაიას პარტიიდან წასვლის შესახებ განცხადებამდე, „ევროპული საქართველოს“ ერთ-ერთმა ლიდერმა ლელა ქებურიამ ჟურნალისტებთან კომენტარი გააკეთა.

ქებურიას თქმით, ღურწკაიას ხელისუფლება პრობლემების მოგვარებას დაჰპირდა და მასზე ზეწოლაც განხორციელდა. მისი მტკიცებით, სწორედ ამიტომ მიიღო ღურწკაიამ პარტიის დატოვების შესახებ გადაწყვეტილება.