პოლიტიკა

ჩემს ჩამოსვლამდე საზღვარი გაამაგრეს და მავთულხლართები დააყენეს - მიხეილ სააკაშვილი

საქართველოს ყოფილი პრეზიდენტისა და ოდესის ექს-გუბერნატორის მიხეილ სააკაშვილის განცხადებით, უკრაინის მთავრობა ყველაფერს აკეთებს, რათა ის არ დაბრუნდეს უკრაინაში. სააკაშვილის მტკიცებით, უკრაინა-პოლონეთის საზღვარზე მავთუხლართები დააყენეს და მობილიზებულია ჯავშანტექნიკა. ამის შესახებ მან რუსთავი 2-ს განუცხადა.

„უკრაინის მთავრობა ყველაფერს აკეთებს, რომ უკრაინაში არ გადავიდე. საზღვარი გაამაგრეს, საზღვარზე ჩამოიყვანეს ჯავშანტექნიკა, მავთულხლართები დააყენეს. ეს სრულიად უპრეცედენტო მოვლენაა, საბჭოთა კავშირის დროს არ ყოფილა ასეთი გამაგრებები აღმოსავლეთ ევროპულ საზღვრებზე საბჭოთა კავშირთან. პირველად ხდება ასეთი რამ ისტორიაში. ეს აჩვენებს მხოლოდ ერთ რაღაცას - მათ ჩემი ძალიან ეშინიათ“, -თქვა სააკაშვილმა, რომელიც ამჟამად კოპენჰაგენში იმყოფება.

ოდესის ყოფილი გუბერნატორის განცხადებით, უკრაინის ხელისუფლება სერიოზულად დაზარალდება, თუ მას ქვეყანაში არ შეუშვებს.

„გაუჭირდებათ არშეშვება და ეს იქნება ძალიან დიდი ზარალი მათთვის. ამიტომ, დავაკვირდებით მოვლენებს. ახლა ჩემი გეგმა არის მხოლოდ ერთი - შესვლა, დაბრუნება, ბოლომდე მოძრაობის სათავეში ჩადგომა და საქმის ბოლომდე მიყვანა“, - თქვა სააკაშვილმა.

26 ივლისს გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს. მიუხედავად ამისა, ის უკრაინაში დაბრუნებას 10 სექტემბერს გეგმავს პოლონეთის მხრიდან.

ანა მებურიშვილი