პოლიტიკა

ჩემი საქმიანობა გამჭვირვალე, საჯარო და გაშუქებულია - იან კელის პასუხი ტრისტან წითელაშვილს

საქართველოში აშშ-ის ელჩმა იან კელიმ თავდაცვის სამინისტროს ყოფილი თანამშრომლის, ტრისტან წითელაშვილის ბრალდებას უპასუხა, რომლის თანახმად „აშშ-ის ელჩი საქართველოს შიდა საქმეებში“ ერევა და პანკისის ხეობაში, სირიიდან დაბრუნებულ ისლამური სახელმწიფოს ტერორისტებს შეხვდა.

იან კელის განცხადებით, მისი საქმიანობა საჯარო და გაშუქებულია. რაც შეეხება პანკისის ხეობას, ელჩის თქმით, ის იქ მხოლოდ ერთხელ ჩავიდა, ისიც ნახევარი საათით, ხოლო ამერიკის მთავრობის ერთ-ერთი ამოცანა ტერორიზმთან და ექსტრემიზმთან ბრძოლაა.

„მოხარული ვარ, რომ შემიძლია, ამ უსაფუძვლო ბრალდებებთან დაკავშირებით დასმულ შეკითხვას გავცე პასუხი. პანკისის ხეობაში ვიყავი ერთხელ და ისიც საქართველოს პრეზიდენტ გიორგი მარგველაშვილთან ერთად. ალბათ, სულ რაღაც ნახევარი საათის განმავლობაში ვიმყოფებოდი იქ. მიმაჩნია, რომ საქმიანობის გამჭვირვალობა და საჯაროობა არის უმნიშვნელოვანესი. ჩემი საქმიანობა არის გამჭვირვალე, საჯარო და გაშუქებული. მე მხარს ვუჭერ საქართველოს რეფორმების პროცესს, საქართველოს ევროატლანტიკურ მისწრაფებებსა და საქართველოს განვითარებას. ზოგადად, ჩემი მთავრობა ებრძვის ტერორიზმისა და ექსტრემიზმის ნებისმიერ გამოვლინებას", - განაცხადა კელიმ.

შეგახსენებთ, გუშინ თბილისის სახელმწიფო უნივერსიტეტში გაიმართა კონფერენცია თემაზე „დასავლური საფრთხეები საქართველოში“, რომლის ერთ-ერთი მონაწილე ტრისტან წითელაშვილი იყო.

საინფორმაციო სააგენტო პატრიოტი tv-ის გავრცელებულ ვიდეოში წითელაშვილმა ამერიკის ელჩი დაადანაშაულა, რომ კელი ქვეყნის შიდა საქმეებში ერევა და სირიიდან დაბრუნებულ ტერორისტებს შეხვდა.

ანა მებურიშვილი