პოლიტიკა

ჩემი მთავრობის ერთ-ერთი საყვარელი მინისტრი მუშად მოეწყო მშენებლობაზე აშშ-ში, კიდევ ერთი ყოფილი მინისტრი კი სატვირთოს მძღოლია - მიხეილ სააკაშვილი

„რამდენიმე ათასი დოლარი მაქვს. ამჟამად ეს საკმარისია“, - უთხრა საქათველოს ექს-პრეზიდენტმა მიხეილ სააკაშვილმა რუსულ გამოცემა „მედუზას“.

როგორც მან ინტერვიუში განაცხადა, მას მოუვიდა შემოთავაზებები ლექციების წაკითხვის შესახებ.

„არ დავიკარგები. კიდევ ერთხელ ვამბობ: უკვე მაქვს შემოთავაზებები ლექციების წაკითხვის შესახებ და ვფიქრობ, მექნება უამრავი სხვა შესაძლებლობა, ასარჩევი მექნება. ამიტომ არ ვიქნები დამოკიდებული, მაგალითად, ჩემი პარტიის შემოსავლისგან ან ჩვენი პარტიის ფანდრაიზინგისგან უკრაინაში“, - უთხრა სააკაშვილმა „მედუზას“.

მისი მტკიცებით, საქართველოს პრეზიდენტობის დროს მას ქონება არ დაუგროვებია. სააკაშვილის თქმით, აშშ-ში ცხოვრების პერიოდში ის ლექციებს კითხულობდა ბოსტონში, ტაფტსის უნივერსიტეტში.

„ლექციებს ვკითხულობდი ბოსტონში, ტაფტსის საერთაშორისო ურტიერთობათა უნივერსიტეტის სკოლაში. სპეციალურად მომიფიქრეს სტატუსი - დამარქვეს „მსხვილი უცხოელი პოლიტიკური მოღვაწე“, რაღაც მაგდაგვარი. ჩემ შემდეგ , მგონი, კოფი ანანმა დაიკავა ეს თანამდებობა. გარდა ამისა, მსოფლიოს გარშემო ვმოგზაურობდი, ლექციებს ვკითხულობდი, ცუდად არ მიხდიდნენ ამ ლექციებისთვის, ნუ, ძალიან კარგადაც მიხდიდნენ - ათობით ათას დოლარს“, - თქვა სააკაშვილმა.

მისივე მტკიცებით, რამდენიმე მისი ყოფილი მინისტრი მუშად მოეწყო აშშ-ში, თუმცა მათი ვინაობა არ დაუსახელებია.

„რომ იცოდეთ, ჩემი მთავრობის ერთ-ერთი საყვარელი მინისტრი, ის ასევე იყო თბილისის პირველი ვიცე-მერი, როგორც მახსოვს, ნახევარმილიონიანი ქალაქის დიდი ბიუჯეტით, ის ახლა მუშაა მშენებლობაზე ამერიკაში, კიდევ ერთი ყოფილი მინისტრი კი სატვირთოს მძღოლია აშშ-ში. ის საქართველოში დარჩა, შიმშილობდა - და რა ექნა? თუ ეკონომიკის სფეროში ხარ, შეიძლება მოეწყო როგორც ვერა ქობალია [ეკონომიკის ყოფილი მინისტრი], ის ახლა ინდონეზიის მთავრობის მთავარი მრჩეველია. ყოფილმა პრემიერ-მინისტრმა, მაგალითად შექმნა რეფორმების სააგენტო და მთელ მსოფლიოში მოგზაურობს - აფრიკაში, ალბანეთში. მას ხელფასს უხდიან იმისათვის, რომ ის ქართული რეფორმების გამოცდილებას უზიარებს“, -აღნიშნა სააკაშვილმა.