სამართალი

ჩემი მეორე დაპატიმრება განხორციელდა სანდრო გირგვლიანის მკვლელობის საქმის არასწორი გამოძიების გადასაფარად - გია გვიჩიანი

მთავარი პროკურატურის ახალი გამოძიებით და სასამართლოს დღევანდელი გადაწყვეტილებით დასრულდა 11 წლიანი უკანონო პატიმრობა, რომლის საფუძველი იყო ენერგეტიკის სექტორში ჩემი საქმიანობა და სააკაშვილის რეჟიმი,- განუცხადა ჟურნალისტებს გია გვიჩიანმა, რომელიც თელასის ფინანსური მენეჯერის ნიკა ლომინაძის მკვლელობის საქმისთვის ნიკა ჩემიასთან ერთად იხდიდა სასჯელს და დღეს სააპელაციო სასამართლოს გადაწყვეტილებით გამართლდა.

როგორც ჟურნალისტებს სასამართლო დარბაზიდან გათავისუფლებულმა გვიჩიანმა განუცხადა, დეტალებზე უახლოეს პერიოდში ისაუბრებს.

მისივე თქმით, ის მზად არის ნებისმიერ კითხვას უპასუხოს, მათ შორის ლომინაძის ოჯახის წევრების განცხადებებს, რომლებიც აცხადებენ, რომ გვიჩიანის წინააღმდეგ კონკრეტული მტკიცებულებები არსებობდა.

„ეს არის სრულიად უსაფუძვლო განცხადებები, არ ეფუძნება არაფერს და უფრო დეტალურად მოგვიანებით ვისაუბრებ იმიტომ, რომ ახლა ვერ მოესწრება. იყო ორი დაპატიმრება ჩემი, პირველი დაპატიმრება იყო სამ დღიანი, ხოლო მეორედ სამუდამო პატიმრობა მომისაჯეს. მეორე დაპატიმრება არის პირველის გაგრძელება. პირველმა გამოიწვია შედეგად მეორე და მეორე დაპატიმრება განხორციელდა სანდრო გირგვლიანის მკვლელობის საქმის არასწორი გამოძიების გადასაფარად,“ - აცხადებს გია გვიჩიანი.

შეგახსენებთ, რომ პროკურატურამ სააპელაციო სასამართლოს გვიჩიანისა და ჩემიას განაჩენის გადასინჯვის მოთხოვნით დაახლოებით 2 თვის წინ მიმართა. პროკურატურის შუამდგომლობის საფუძველი ის გამოძიება გახდა, რომელიც საგამოძიებო უწყებაში ხელახლა ჩატარდა.

2006 წლის 15 აგვისტოს ”ეი-ი-ეს თელასის” ფინანსური მენეჯერის, ნიკა ლომინაძის მკვლელობის საქმეზე გია გვიაჩიანს და ნიკა ჩემიას მიმართ გამამტყუნებელი განაჩენი გამოიტანეს. ნიკა ჩემიამ და გიორგი გვიჩიანმა დანაშაული არ აღიარეს, მათ უვადო პატიმრობა მიესაჯათ. მოგვიანებით პატიმრობა 20 წლით განისაზღვრა.

ნინო ექვთიმიშვილი