პოლიტიკა

ჩემი არჩევანი ”ქართულ ოცნებაზე” კეთდება - ზურაბ აბაშიძე

„თავისუფალი დემოკრატების“ ყოფილი წევრის ზურაბ აბაშიძის განცხადებით, მას და მის თანაგუნდელებს თანამდებობები რომ ნდომოდათ, ოპოზიციაში არ წავიდოდნენ.

მისი თქმით, არჩევნების შემდეგ პარტია თავმჯდომარემ, გენერალურმა მდივანმა და სხვა ლიდერებმა იმის ნიშნად დატოვეს, რომ მარცხზე პასუხისმგებლობა აიღეს.

„არავის პარტიისთვის არ უღალატია, ეს არის სრული აბსურდი. ჩვენ თანამდებობისთვის არასდროს გვიბრძოლია - ჩვენთვის თანამდებობა ყოველთვის იყო საშუალება იმისა, საქმე გვეკეთებინა”, - განაცხადა ზურაბ აბაშიძემ.

როგორც აბაშიძემ პრესკონფერენციაზე განაცხადა, როდესაც „თავისუფალმა დემოკრატებმა“ არჩევნები ვერ მოიგეს, პირადად მისთვის მეორე არჩევანი იყო „ქართული ოცნება“ და არა ნაციონალური მოძრაობა.

„როდესაც ”თავისუფალმა დემოკრატებმა” არჩევნები ვერ მოიგეს, ბუნებრივია, ჩემი არჩევანი ”ქართულ ოცნებაზე” კეთდება, რომელთან ერთადაც ძალიან მნიშვნელოვანი პერიოდი გამოვიარეთ - მათთან ერთად ვიყავით ხელისუფლებაში, ერთად ვიბრძოლეთ მიხეილ სააკაშვილის რეჟიმის წინააღმდეგ და რა არის ამაში გაუგებარი და გაურკვეველი“,-განაცხადა აბაშიძემ.

მონიკა დავლიანიძე