პოლიტიკა

ჭავჭავაძის #33-ში, ყოფილი სკვერისა და სტადიონის ტერიტორიაზე კორპუსის მშენებლობა ადგილობრივებმა კიდევ ერთხელ გააპროტესტეს

თბილისში, ჭავჭავაძის #33-ში, ადგილობრივებმა კიდევ ერთხელ გააპროტესტეს ყოფილი სკვერისა და სტადიონის ტერიტორიაზე კორპუსის მშენებლობა. შეკრებილებს თბილისის მერობის ყოფილი კანდიდატი ალეკო ელისაშვილიც შეუერთდა.

ადგილობრივების ინფორმაციით, მშენებლობა 2012 წელს დაიწყო და რამდენჯერმე შეჩერდა. შეკრებილების თქმით, სასამართლომ სამშენებლო კომპანიას K2-ის კოეფიციენტთან დაკავშირებით 22-სართულიანი შენობის აგება აუკრძალა, თუმცა 2018 წლის თებერვლიდან ადგილზე მშენებლობა კვლავ განახლდა.

„აღნიშნული სამშენებლო კომპანია დანაშაულებრივი ორგანიზაციაა, რომელმაც მოახერხა აქ მდებარე სტადიონისა და სკვერის შესყიდვა. როგორ შეძლო ეს, დღემდე ჩვენთვისაც გაუგებარია. მშენებლობა ყოველგვარი უსაფრთხოების ნორმების დაცვის გარეშე მიმდინარეობს. აქ არის გაზგამანაწილებელი, რომლისგანაც არსებული კანონებით მინიმუმ 10 მეტრით უნდა იყოს დაშორებული, რაც არ სრულდება. მშენებლობის პროცესი გაზგამანაწილებელთან მიბჯენით ხორციელდება. ერთ კვადრატული მეტრიც კი არ გააჩნია შენობას, რომ რაიმე წითელ ხაზებში საკუთარი ინფრასტრუქტურა ჰქონდეს“, - განაცხადა ადგილობრივმა მცხოვრებმა გიორგი ანდრიაძემ.

თავის მხრივ, ალეკო ელისაშვილმა თბილისის მერ კახა კალაძეს საქმით დაინტერესებისკენ მოუწოდა.

„ჩვენ კალაძე გვპირდებოდა, რომ შეჩერდებოდა ურბანული სუიციდი, ქალაქი სიცოცხლით გაივსებოდა, რაც ვერ გაბედა უგულავამ და ნარმანიამ, დღეს იმას ბედავს კალაძე. მოვიდეს აქ თავისი სელფის ჯოხით და ჩართვა განახორციელოს აქედან. ნახოს, რა ხდება აქ, ზღაპრებს რომ ყვება“, -თქვა ელისაშვილმა.