პოლიტიკა

ჩამოვიდეს სააკაშვილი, მას ქართული მართლმსაჯულება და პენიტენციური დაწესებულება ელოდება - მამუკა მდინარაძე

ფრაქცია „ქართული ოცნების“ თავმჯდომარე მამუკა მდინარაძე გამოეხმუარა მიხეილ სააკაშვილის ვიდეომიმართვას, სადაც ის აანონსებს საქართველოში ჩამოსვლას ხელისუფლების შესაცვლელად.

„სააკაშვილის საქართველოში ჩამოსვლით ნურავინ გვაშინებს, ჩამოვიდეს, დავხვდებით, მას ქართული მართლმსაჯულება და პენიტენციური დაწესებულება ელოდება“, -თქვა მდინარაძემ.

დეპუტატის თქმით, ქვეყანა წარსულს არ დაუბრუნდება.

„საქართველო წარსულს, მით უფრო, ნეგატიურ წარსულს, არასდროს დაუბრუნდება. არ ვიცი, რატომ ფიქრობენ, რომ საზოგადოებას ის ბოროტება დაავიწყდა, რაც წინა ხელისუფლებამ ქვეყანას თავს დაატეხა. ყველა შემთხვევაში ეს პათოსი დამარცხებისთვის არის განწირული“, - განაცხადა მდინარაძემ.

საქართველოს ყოფილმა პრეზიდენტმა და ოდესის ექს-გუბერნატორმა თავის ვიდეომიმართვაში განაცხადა, რომ ქვეყანაში მძიმე სოციალური ფონია და ამის შესაცვლელად ხელისუფლების შეცვლაა საჭირო, რაც უნდა მოხდეს საპრეზიდენტო არჩევნების კვალდაკვალ.