პოლიტიკა

ჩაბუქის საქმეზე ლტოლვილთა სამინისტრო გადაწყვეტილებას 7 ივლისს მიიღებს - თუბა ჩაბუქი

7 ივლისს გახდება ცნობილი, მიანიჭებენ თუ არა დემირელის სკოლის მენეჯერ მუსტაფა ემრე ჩაბუქს ლტოლვილის სტატუსს. ამის შესახებ მისმა ცოლმა, თუბა ჩაბუქმა სოზარ სუბარის წარმომადგენლებთან შეხვედრის შემდეგ განაცხადა.

„საქმეზე გადაწყვეტილებას დევნილთა და განსახლების სამინისტრო 7 ივლისს მიიღებს. დიდი იმედი გვაქვს, რომ ეს საქმე ერთხელ და სამუდამოდ დასრულდება. ვფიქრობთ, გადაწყვეტილება ჩვენს სასარგებლოდ იქნება მიღებული,“ - განუცხადა თუბა ჩაბუქმა ჟურნალისტებს.

ჩაბუქის ადვოკატის, ვახტანგ კვიჟინაძის განცხადებით, მათ ლტოლვილთა სამინისტროს წარმომადგენლებს ოჯახის მიმართ განხორციელებული მუქარის ფაქტები წარუდგინეს.

„წარდგენილი იქნა ნათარგმნი სოციალური ქსელიდან, არაერთი განცხადება, რომელშიც მას პირდაპირ ემუქრებიან ფიზიკური განადგურებით, იმ შემთხვევაში, თუ ისინი თურქეთის რესპუბლიკაში აღმოჩნდებიან რაიმე გზით, მას, მის შვილებს და მის მეუღლეს. ეს არის თვალსაჩინოდ, ცხადად, ეს არის პირდაპირი მუქარა,“ - განაცხადა კვიჟინაძემ.

დემირელის კოლეჯის მენეჯერი მუსტაფა ემრე ჩაბუქი 24 მაისს, თურქეთის მხარის მოთხოვნით დააკავეს. მას ბრალად ედება ტერორისტულ ორგანიზაციებთან თანამშრომლობა. 25 მაისს მას წინასაექსტრადიციო სამთვიანი პატიმრობა შეუფარდა.