პოლიტიკა

ჩაბუქის განაცხადი საქართველოში ლტოლვილის სტატუსის მინიჭების თაობაზე არ დაკმაყოფილდა თურქეთში შესაძლო საფრთხის მიუხედავად - Amnesty International-ი

საერთაშორისო ორგანიზაცია Amnesty International-ი თბილისში თავისი ყოველწლიური ანგარიშის პრეზენტაციას მართავს. მსოფლიო და რეგიონულ საკითხებთან ერთად მოხსენებაში შეფასებულია 2017 წელი საქართველოში. ანგარიშში მოხვდა დემირელის კოლეჯის მენეჯერის, მუსტაფა ემრე ჩაბუქის საქმეც.

დოკუმენტში მითითებულია, რომ საქართველოს ლტოლვილთა დ განსახლების სამინისტრომ ჩაბუქისთვის ლტოლვილის სტატუსის მინიჭებაზე უარის თქმისას არ გაითვალისწინა ის ფაქტი, რომ თურქეთში დაბრუნების შემთხვევაში ჩაბუქის სიცოცხლე საფრთხის ქვეშ დადგებოდა.

„24 მაისს თურქეთის მოქალაქე მუსტაფა ჩაბუქი, რომელიც საქართველოში 2002 წლიდან ცხოვრობს, თურქეთის მხრიდან ექსტრადირების მოთხოვნის საფუძველზე დააკავეს. ჩაბუქს თურქეთის მხარე ბრალს „ტერორიზმის მხარდაჭერასა“ და ფეთჰულა გიულენთან კავშირში დებს. მიუხედავად იმისა, რომ თურქეთში დაბრუნების შემთხვევაში, მუსტაფა ჩაბუქს წამებისა და არასათანადო მოპყრობის რეალური საფრთხე ემუქრებოდა, მისი განაცხადი საქართველოში ლტოლვილის სტატუსის მინიჭების თაობაზე არ დაკმაყოფილდა. ჩაბუქმა გადაწყვეტილება გაასაჩივრა. წლის ბოლოსთვის ის ჯერ კიდევ წინასაექსტრადიციო პატიმრობაში რჩებოდა“, - წერია Amnesty International-ის ანგარიშში.

ცნობისთვის, მუსტაფა ემრე ჩაბუქი 19 თებერვალს თბილისის საქალაქო სასამართლოს მოსამართლემ გირაოს სანაცვლოდ გაათავისუფლა. ჩაბუქს 9-თვიანი წინასწარი პატიმრობის ვადა 24 თებერვალს ეწურებოდა.