სამართალი

ბუტა რობაქიძის საქმეზე ბრალდებული ზაზა ბაქრაძე 5 ათას ლარიანი გირაოს სანაცვლოდ გათავისუფლდა

თბილისის საქალაქო სასამართლოს მოსამართლემ ბუტა რობაქიძის საქმეზე ბრალდებული, კრიმინალური პოლიციის ყოფილი უფროსი, ზაზა ბაქრაძე 5 ათას ლარიანი გირაოს სანაცვლოდ გაათავისუფლა.

აღნიშნული გადაწყვეტილებით მოსამართლემ დაცვის მხარის შუამდგომლობა გაიზიარა.

სასამართლო სხდომაზე ზაზა ბაქრაძემ მომხდარიდან 6 წლის შემდეგ ბრალი აღიარა და განაცხადა, რომ გარდაცვლილ რობაქიძე იარაღი არ ჰქონდა და ის შემთხვევის ადგილზე სამართალდამცველებმა, კერძოდ კი საპატრულო პოლიციის ყოფილმა უფროსმა ზურაბ მიქაძემ მიიტანა.

სასამართლოს გადაწყვეტილების გამოცხადების შემდეგ ბრალდებულმა, ზაზა ბაქრაძემ მედიასთან კომენტარი არ გააკეთა. პროკურორი, ლაშა კოტრიკაძე ზაზა ბაქრაძის ჩვენებას სარწმუნოდ მიიჩნევს.

გარდაცვლილი ბუტა რობაქიძის მამის, სოსო რობაქიძის თქმით, სხვა ბრალდებულების მსგავსად მასაც ეკუთვნის გირაოთი გარეთ ყოფნა, რადგან ის არის ერთადერთი ბრალდებული, რომელმაც მისი შვილის საქმეზე ბრალი აღიარა.

ამასთან, კიდევ ერთი ბრალდებული გურამ დონაძე აცხადებს, რომ ზაზა ბაქრაძემ სასამართლოს წინაშე იცრუა.

სხდომა სიტყვიერი დაპირისპირების და ხმაურის ფონზე წარიმართა.

სასამართლო დარბაზში დაპირისპირება გურამ დონაძის რეპლიკას მოყვა. მან რობაქიძის ოჯახს ე.წ. დაზარალებული უწოდა.

დონაძეს ბუტა რობაქიძის დედამ, ია მეტრეველმა უპასუხა და აღნიშნა, რომ ე.წ. სიტყვის გამოყენება მისთვის შეურაცხმყოფელია.

სიტყვიერი დაპირისპირების შედეგად სოსო რობაქიძემ და მისი ოჯახის ახლობლებმა სხდომათა დარბაზი დატოვეს.