სამართალი

ბრალდებული გიორგი მამალაძე სხვადასხვა შპს-ში გაფორმებული იყო შპს-ს მამაოდ - ზვიად გუბელაძე

ე.წ ციანიდის საქმის პროკურორის ზვიად გუბელაძის თქმით, პროცესზე დაიკითხა ერთ-ერთი მოწმე, რომელმაც თქვა, რომ ბრალდებული დეკანოზი სხვადასხვა შპს-ში გაფორმებული იყო, როგორც „შპს -ს მამაო“.

პროკურორის თქმით, გიორგი მამალაძე ყოველთვიურად იღებდა ხელფასს, ასევე საახლო პრემიებსაც.

„სასამართლო პროცესზე დაიკითხა ერთ-ერთი შპს-ს დირექტორი, რომელმაც განმარტა, რომ ბრალდებული გიორგი მამალაძე სხვადასხვა შპს-ში გაფორმებული იყო შპს-ს მამაოდ, ყოველთვიურად იღებდა სხვადასხვა რაოდენობის ხელფასს და მათ შორის საახალწლოდ პრემიებსაც. ნაცვლად იმისა, ბრალდებულს სასულიერო მოღვაწეობა განეხორციელებინა, ის დაკავებული იყო ანგარებით და სხვადასხვა უსაფუძვლო გამდიდრებით, მათ შორის საპატრიარქოს ქონების მეშვეობით", - განაცხადა გუბელაძემ.

ბრალდებულის ადვოკატის მიხეილ რამიშვილის თქმით, არ არსებობს არავითარი „შპს მამაო“.

რამიშვილის განმარტებით, ქალბატონი, რომლის სულიერი მამაა დეკანოზი, ქველმოქმედებას ეწევა და ასეთი ქველმოქმედების ფარგლებში იგი ურიცხავდა ხელფასს მამა გიორგი მამალაძეს.

„მოწმემ ბრძანა, რომ მამა გიორგი იყო მისი ოჯახის, მისი პირადი სულიერი მამა. როცა დაფუძნდა კომპანია და ამ კომპანიის თანამშრომლებთან მამა გიორგის ჰქონდა ურთიერთობა როგორც სულიერ მოძღვარს, ამ შპს-ს დირექტორმა გადაწყვიტა განეხორციელებინა ქველმოქმედება.

შემოწირულობას ხომ იღებს მოსახლეობისგან საპატრიარქო, სასულიერო პირები და ასეთივე შემოწირულობას იღებდა მამა გიორგი. ეს ქალბატონი ყოველ თვე ურიცხავდა გარკვეულ თანხას.

ქალაბატონმა ირმამ არაერთხელ დაადასტურა, რომ მანამდეც არაერთი სასულიერო პირისთვის გაუწევია ასეთი ქველმოქმედება. არ არსებობს ასეთი ოფიციალური სტატუსი - შპს-ს მამაო. ეს არის ხელფასი, რომელსაც ქველმოქმედების სახით აძლევდნენ მამა გიორგის. შპს-ს მამაო, არ არის ასეთი სტატუსი, და ეს არის ხელფასი, რომელსაც ვთქვათ ქველმოქმედების სახით აძლევდა მამა გიორგის , როგორც მის სულიერ მოძღვარს“,-განმარტა ადვოკატმა.

მონიკა დავლიანიძე