პოლიტიკა

ბოსნია და ჰერცეგოვინას საარჩევნო ადმინისტრაციის დელეგაცია საქართველოს საარჩევნო საგანმანათლებლო პროექტებს ეცნობა

ბოსნია და ჰერცეგოვინას საარჩევნო ადმინისტრაციის დელეგაცია საქართველოს საარჩევნო საგანმანათლებლო პროექტებს ეცნობა.

ცენტრალური საარჩევნო კომისიის ინფორმაციით, დღეს, დელეგაციის წარმომადგენლები ცენტრალური საარჩევნო კომისიის და ცესკოს სწავლების ცენტრის წარმომადგენლებს შეხვდნენ. ცესკოს თავმჯდომარის მოადგილე გიორგი შარაბიძე მათ როგორც სწავლების ცენტრის, ისე საარჩევნო ადმინისტრაციის საქმიანობის თაობაზე და განხორციელებული და მიმდინარე პროექტების შესახებ ესაუბრა.

მხარეები, ასევე შეთანხმდნენ ურთიერთგაგების მემორანდუმის გაფორმებაზე, რომელიც ორი ქვეყნის საარჩევნო ადმინისტრაციებს შორის თანამშრომლობის გაღრმავებას ითვალისწინებს.

„ბოსნია-ჰერცეგოვინას საარჩევნო ადმინისტრაციის წარმომადგენლებმა ევროპის საბჭოს პროექტის ფარგლებში მოისურვეს ჩვენთან შეხვედრა, იმისათვის რომ გაიზიარონ ჩვენი გამოცდილება სწავლების ცენტრის საქმიანობასთან დაკავშირებით. შეხვედრა იყო ძალიან საინტერესო, როგორც მათ თავად აღნიშნეს, ცესკოს სწავლების ცენტრი არის ევროპაში ერთ-ერთი პირველი და წარმატებული პროექტი, რომლის გამოცდილების გაზიარებაც მათ სურთ იმისთვის რომ საკუთარ ქვეყანაში დანერგონ ჩვენი გამოცდილება“, -აღნიშნა გიორგი შარაბიძემ შეხვედრის დასრულების შემდეგ.

დელეგაციის ხელმძღვანელის, ბოსნია და ჰერცეგოვინას საარჩევნო ადმინისტრაციის წევრის, სუად არნაუტოვიჩის თქმით, არსებითად მნიშვნელოვანია სწავლების ცენტრის საქმიანობასთან დეტალურად გაცნობა.

„ბოსნია და ჰერცეგოვინას ცენტრალური საარჩევნო კომისიის სურვილია, შექმნას ასეთივე სასწავლო ცენტრი. ჩვენ გვსურს გავიზიაროთ თქვენი გამოცდილება და ცოდნა ამ მიმართულებით. ასევე ვისაუბრეთ ურთიერთგაგების მემორანდუმის შესახებაც, რომლის ფარგლებშიც გამარტივდება დელეგაციების გაცვლა, გამოცდილების ურთიერთგაზიარება, დამკვირვებლების მოვლინება და ა.შ. იმედი მაქვს, ეს კიდევ უფრო მეტად გააძლიერებს თანამშრომლობას ჩვენი ქვეყნების საარჩევნო ადმინისტრაციებს შორის“,- განაცხადა სუად არნაუტოვიჩმა.

სწავლების ცენტრის დირექტორის ნათია ზაალიშვილის ინფორმაციით, ვიზიტის ფარგლებში დელეგაციის წევრები დეტალურად მიიღებენ ინფორმაციას იმ სასწავლო პროექტების შესახებ, რომელსაც სწავლების ცენტრი არჩევნებში ჩართული მხარეებისთვის ახორციელებს.

„დელეგაციას ასევე ექნება შესაძლებლობა დაესწროს სწავლების ცენტრის მიერ ორგანიზებულ სასწავლო პროგრამას, რომელიც პოლიტიკური პარტიებისთვის და საარჩევნო ადმინისტრაციის პოტენციური მოხელეებისთვის ხორციელდება. ვფიქრობთ, ასეთი ფორმატის თანამშრომლობა საარჩევნო ადმინისტრაციებს შორის არის ძალიან პოზიტიური და ემსახურება მსოფლიო მასშტაბით დემოკრატიული პროცესების წარმართვასა და ხელშეწყობას“, -აღნიშნა ნათია ზაალიშვილმა.

დელეგაციის ვიზიტი, რომლის შემადგენლობაშიც არიან ბოსნია და ჰერცეგოვინას საარჩევნო ადმინისტრაციის და ევროსაბჭოს წარმომადგენლები, საქართველოში 6 ივნისს დაიწყო და 9 ივნისს დასრულდება. სასწავლო ვიზიტი ევროპის საბჭოს ფინანსური მხარდაჭერით ხორციელდება.