პოლიტიკა

ბოლო ორი წელია, უწყვეტ რეჟიმში, სკანდალიდან სკანდალამდე ვცხოვრობთ თავდაცვის სამინისტროსთან მიმართებით - თინათინ ხიდაშელი

თავდაცვის ყოფილი მინისტრი თინათინ ხიდაშელი გამოეხმაურა უწყებაში მომხდარ ბოლო სკანდალს, რომელიც ეხება ტყვია-წამლის უკანონო ვაჭრობას.

ხიდაშელის შეფასებით, უწყება სკანდალიდან სკანდალამდე ცხოვრობს, რის გამოც უნდა დადგეს მოქმედი მინისტრის, ლევან იზორიას პასუხისმგებლობის საკითხი. ხიდაშელის აზრით, უწყებაში ან საერთოდ მოშლილია კონტროლის სისტემა, ან მიშვებულია.

„ეს ძალიან მძიმე შემთხვევა, ალბათ, ყველა იმ დღემდე უკვე ბოლო ორი წლის განმავლობაში უწყებაში ძალიან ბევრი სკანდალი და უხერხული მოვლენა მოხდა. იმის გამო, რომ ბოლო ორი წელია, უწყვეტ რეჟიმში სკანდალიდან სკანდალამდე ვცხოვრობთ თავდაცვის სამინისტროსთან მიმართებაში, აუცილებლად უნდა დადგეს მისი პასუხისმგებლობის საკითხი. არ შეიძლება, ყოველ ორ კვირაში ერთხელ მორიგი სერიალის გმირი იყოს თავდაცვის მინისტრი იმიტომ, რომ ეს ძალიან მძიმედ აისახება შემდეგ მრავალ ათას ადამიანზე, რომელიც იქ არის დასაქმებული. რასაც ვაკვირდებით ბოლო ერთი წლის განმავლობაში, ნათლად აჩვენებს, რომ თავდაცვის სამინისტროში, უკაცრავად ჟარგონისთვის, მაგრამ „ყველაფერი მოსულა.“ ან საერთოდ მოშლილია კონტროლის სისტემა, ან მიშვებულია.

ლევან იზორიას თავდაცვის სამინისტროში მისვლა იყო ძალიან ცუდი მესიჯი, ცუდი გზავნილი უწყებისთვის, რომ შესაძლებელი იყო, ყველაფერი სხვაგვარად წარმართულიყო. მთელი ეს სკანდალები, სისხლის სამართლის დანაშაულები, რომელიც ამის შემდეგ ხდება, ფულის გაფლანგვა, დასკვნები, რომელსაც აუდიტის სამსახური დებს, არაფერი ჩემთვის არ არის გასაკვირი. ამაზე მისი დანიშვნის პირველ დღესვე ვსაუბრობდი“, -უთხრა ხიდაშელმა რუსთავი 2-ს.

საქართველოს შეირაღებული ძალებიდან ტყვია-წამლის უკანონოდ ვაჭრობის საქმეზე სისხლის სამართლებრივი დევნა ოთხი პირის მიმართ არის დაწყებული. მათგან სამი სამხედრო მოსამსახურეა, ერთი კი - სოლომონ ბლუაშვილი, სამოქალაქო პირი.

სავარაუდოდ, სამხედროებს ტყვია-წამალი ბლუაშვილთან მიჰქონდათ. მისი ადვოკატის თქმით, მისი დაცვის ქვეშ მყოფს ბრალი მხოლოდ საბრძოლო ვაზნების უკანონოდ შეძენა-შენახვაში აქვს წარდგენილი და სოლომონ ბლუაშვილს რეალიზაციის ფაქტთან შეხება არ აქვს.

„კურიერის“ ინფორმაციით, იარაღით უკანონოდ ვაჭრობა თავდაცვის სამინისტროში ერთი წლის განმავლობაში ხდებოდა, თუმცა შიდა კონტროლის სამსახურმა ფაქტი ვერ გამოავლინა.