პოლიტიკა

ბიძინა ივანიშვილმა ისევ იღებს საკუთარ თავზე ამ ძალიან დიდ ტვირთსა და პასუხისმგებლობას, რაც 2012 წელს ერთხელ უკვე გააკეთა - ეკა ბესელია

„ახლა დგას ეტაპი, როცა მმართველი პარტია ამბობს, რომ ვხედავთ პრობლემებს, რაც არის ქვეყანაში - ამავე დროს, ჩვენ პირდაპირ ვეუბნებით ხალხს, რომ სასწორზე დგას მონაპოვარი, რაც 2012 წლის გამარჯვებამ მოიტანა“, - ასე გამოეხმაურა საპარლამენტო უმრავლესობის წევრმა ეკა ბესელიამ „ქართული ოცნების“ თავმჯდომარის ბიძინა ივანიშვილის ვიდეომიმართვას.

„ბიძინა ივანიშვილის მიმართვის ყველა ასპექტი და პუნქტი არის ძალიან საყურადღებო. არის გულწრფელად ღია სათქმელი მოსახლეობასთან. ეს არის, ერთი მხრივ, რეალობის ძალიან გულწრფელი და ობიექტური ანალიზი, იმ შეცდომებისა და პრობლემების დანახვა, რასაც მმართველი პარტია ხედავს. ამავე დროს, ყველაზე მნიშვნელოვანი ამ მოცემულობაზე პასუხისმგებლობის განცდა და გააზრებაა. ახლა დგას ეტაპი, როცა მმართველი პარტია ამბობს, რომ ჩვენ ვხედავათ პრობლემებს, რაც არის ქვეყანაში. ამავე დროს, ჩვენ ღიად და პირდაპირ ვეუბნებით ხალხს, რომ ახლა ამ არჩევნებით სასწორზე ის მონაპოვარი დგას, რაც 2012 წლის გამარჯვებამ ხანგრძლივი ბრძოლის შედეგად მოიტანა. ეს მონაპოვარი არის თავისუფლება, ადამიანის უფლებები, ქვეყნის გამთლიანების პროცესის დაწყება - ადამინის, როგორც ყველაზე მთავარი ღირებულების პატივისცემა“, - განაცხადა დეპუტატმა.

დეპუტატის თქმით, ნებისმიერი არჩევნები ხელისუფლებისთვის არის გამოცდა და ანალიზისთვის კარგი ინდიკატორი.

„ამ არჩევნებით კარგად დავინახეთ, რომ არის არა ერთი, არამედ რამდენიმე მნიშვნელოვანი საკითხი, რაც ჩვენს მოქალაქეებს აწუხებს. არსებული პრომლემების გადაწყვეტას გაბედული ნაბიჯები, სიახლეები და კომპელექსური ცვლილებები სჭირდება. ეს ის შემდგომი ეტაპია, რაც არჩევნების დასრულებას უნდა მოჰყვეს. პასუხისმგებლობა ყველამ თავის სფეროზე უნდა გადავინაწილოთ და არაერთმა ადამიანმა, ბიძინა ივანიშვილმა, იმის მიუხედავად, რომ ის ისევ იღებს საკუთარ თავზე ამ ძალიან დიდი ტვირთსა და პასუხისმგებლობას, რაც 2012 წელს ერთხელ უკვე გააკეთა“, - განაცხადა ბესელიამ.