პოლიტიკა

ბიძინა ივანიშვილმა აიღოს პასუხისმგებლობა მთავრობის ფუნქციონირებაზე - დავით უსუფაშვილი

პარტია „შენების მოძრაობის“ ლიდერი დავით უსუფაშვილი პრემიერ-მინისტრ გიორგი კვირიკაშვილის გადადგომას გამოეხმაურა. პოლიტიკოსის განცხადებით, კვირიკაშვილის ნაბიჯი მმართველ გუნდში არსებული შიდა უთანხმოებითაა განპირობებული.

უსუფაშვილმა კონსტიტუციის იმ ჩანაწერზე გაამახვილა ყურადღება, სადაც წერია, რომ მთავრობა მიდის საპარლამენტო უმრავლესობასთან უთანხმოების შედეგად, თუმცა გიორგი კვირიკაშვილმა „ქართული ოცნების“ თავმჯდომარესთან, ბიძინა ივანიშვილთან არსებულ აზრთა სხვადასხვაობაზე ისაუბრა.

„კრიზისი მწიფდებოდა, მოვიდა აქამდე. ჩვენ ვხედავთ, რომ ეს არის გადადგომა შიდა უთანხმოების გამო, რის ნიშნებასაც ვხედავდით, რამაც ალბათ, ბიძინა ივანიშვილის მობრუნება განაპირობა.

საკმაოდ რთული ვითარებაა ქვეყანაში. პრემიერ–მინისტრი გადადგა. ის, როგორც ჩანს, არ მონაწილეობს ახალ კონსულტაციებში. ის ვითარებაც, რომ მან ხაზი გაუსვა პარტიის თავმჯდომარესთან პრობლემებს, კონსტიტუცაში წერია, რომ მთავრობა მაშინ მიდის, როდესაც საპარლამენტო უმრავლესობასთან აქვს უთანხმოება.

ჩვენ ვცხოვრობთ არცთუ მთლად კონსტიტუციურ ვითარებაში, ამიტომ მგონია, რომ სწორი იქნება, დავუახლოვდეთ კონსტიტუციურ რეალობას. აიღოს პასუხისმგებლობა მთავრობის ფუნქციონირებაზე იმ პოლიტიკური ძალის ლიდერმა, რომელიც პარლამენტში უმრავლეოსობაშია, ეს არის ბიძინა ივანიშვილი და მან გააკეთოს ის, რაც შეუძლია. მე არ ვიცი, მას რა შეუძლია, მაგრამ ყველა სხვა ვარიანტი, სხვა პრემიერის შერჩევით და დე-ფაქტო პოლიტიკური გადაწყვეტილების მიღების გაგრძელებით, მგონია, რომ უარეს ვითარებას მივიღებთ“, - განაცხადა უსუფაშვილმა.