პოლიტიკა

ბიძინა ივანიშვილმა აღიარა, რომ თავად არის მარიხუანას კულტივაციის შესახებ კანონპროექტის ერთ-ერთი ინიციატორი

პარტია „ქართული ოცნების“ თავმჯდომარემ ბიძინა ივანიშვილმა სამი წამყვანი არხის ჟურნალისტებთან ინტერვიუში განაცხადა, რომ თავად არის მარიხუანას კულტივაციის შესახებ კანონპროექტის ერთ-ერთი ინიციატორი. ასე უპასუხა მან რუსთავი 2-ის ჟურნალისტის, ეკა კვესიტაძის შეკითხვას, არის თუ არა მარიხუანას კულტივაციის ლეგალიზება მისი იდეა.

„რა თქმა უნდა, მათ რიცხვში სამედიცინო და კოსმეტიური მიმართულებით წარმოებას მხარს ვუჭერდი ერთადერთი მიზეზით - ძალიან დიდი ხიბლია იმაში რომ ჩვენ შეიძლება დამატებით მილიარდი და შეიძლება 2 მილიარდის ექსპორტიც მოვახერხოთ სოფლის მეურნეობის პროდუქციით“, -თქვა ივანიშვილმა.

მისი განმარტებით, კოსმეტიკური და სამედიცინო დანიშნულებით კანაფის წარმოების საკითხზე მსჯელობა გაგრძელდება , თუმცა , თუ მმართველ გუნდში დაასკვნიან, რომ ეს მართლაც ხიფათის შემცველია, ის საზოგადოების წინააღმდეგ არ წავა.

„რასაც აქვს ხიბლი ამ წარმოებაში და რატომაც შევიდა პარლამენტში ეს კანონმდებლობა და მეც ვმონაწილეობდი განხილვაში, სანამ ეს კანონპროექტი შევიდოდა. კიდევ ვიმეორებ, წარმოება სამედიცინო და კოსმეტიკური მოხმარების მიზნით,რენტაბელობა ძალიან დიდი, რაც ჩემთვის ძალიან საინტერესოა-500%-ზე მეტია. არის ძალიან დიდი ობიექტური გათვლები იმისა, რომ შეიძლება მილიარდი დოლარისა და მეტი ექსპორტი განხორციელდეს ერთ, ორ და სამი წლის განმავლობაში. რა თქმა უნდა, შფოთვა, რომელიც გამოავლინა საზოგადოებამ, ადეკვატური იყო რეაქცია გუნდის მხრიდან, კანონპროექტი არის შეჩერებული, გაგრძელდება მასზე მსჯელობა მათ რიცხვში საპატრიარქოსთან“, - აღნიშნა ექს-პრემიერმა.