პოლიტიკა

ბიძინა ივანიშვილი 16 ჰექტარ ტყის მასივს იჯარით წაიღებს 15 000 ლარად 10 წლით, მოიპოვებს იქ ოქროს და მიაგდებს - ნიკა მელია

„ერთიანი ნაციონალური მოძრაობის“ პოლიტიკური საბჭოს თავმჯდომარის, ნიკა მელიას განცხადებით, საყდრისის მიმდებარედ 16 ჰექტარ ტყის მასივზე აუქციონის გამოცხადება არის კორუფციული გარიგება სახელმწიფოსა და RMG GOLD-ს შორის.

მისივე თქმით, ამით დაინტერესებულია ყოფილი პრემიერი ბიძინა ივანიშვილი, რომელიც აპირებს, იჯარით 10 წლით წაიღოს აღნიშნული ტერიტორია.

„ან ჩვენ შევეგუებით, რომ ბოლნისი და დმანისი აბსოლუტურად დაიკარგება და უნდა გადმოსახლდეს, როგორც მინიმუმ, მთელი ბოლნისისა და დმანისის მოსახლეობა იმიტომ, რომ იქ აღარ შეიძლება ცხოვრება, ან მთელი ოპოზიციური სპექტრი, მთელი სამოქალაქო საზოგადოება გავერთიანდებით და ვაიძულებთ, რომ ეს 16 ჰექტარი ტყის ფერდობი, რომელსაც ახლა ივანიშვილი აპირებს 15000 ლარად იჯარით წაიღოს, არც კი ყიდულობს. რატომ უნდა იყიდოს ახლა ბიძინა ივანიშვილმა? 10 წლით სჭირდება. 10 წელიწადში მოიპოვებს იმ ოქროს მისი ჭკუით და მერე მიაგდებს. და რათ უნდა საკუთრებაში? 10 წლით 15 000 ლარს გადაიხდის. ან ჩვენ ახლა ამას შევეგუებით, ან პირდაპირი გაგებით უნდა შევაკვდეთ და დავიცვათ“, -უთხრა მელიამ „რუსთავი 2“-ს.