სამართალი

ბექა შენგელიამ შეიძლება დღეს სხვა თქვას, ხვალ სხვა თქვას, მისი ფსიქიკური პრობლემებიდან გამომდინარე - ადვოკატი

ე.წ. კანიბალიზმის საქმეზე დღევანდელ სასამართლო პროცესზე ის გამომძიებლები დაიკითხნენ, რომლებმაც დანაშაული საქმეზე სხვადასხვა საგამოძიებო მოქმედებები ჩაატარეს.

სხდომა დახურულ რეჟიმში წარიმართა.

სხდომის დასრულების შემდეგ კომენტარი გააკეთა, 76 წლის ლუბა ყოჩიაშვილის განსაკუთრებული სისასტიკით მკვლელობაში ერთ-ერთი ბრალდებულის, ბექა შენგელიას ინტერესების დამცველმა, იზო მახარაძემ.

,,ბექა შენგელიას პოზიციები ბრალთან მიმართებაში მისი ფსიქიკური მდგომარეობიდან გამომდინარე, მყარი არ არის,’’ - განაცხადა ადვოკატმა.

მისი თქმით, ბექა შენგელიამ ,,შეიძლება დღეს სხვა თქვას, ხვალ სხვა თქვას მისი ფსიქიკური პრობლემებიდან გამომდინარე’’.

მისი თქმით, ჯერ კიდევ ბევრი მოწმეა დასაკითხი და როდის იქნება განაჩენი, უცნობია.

საქმის პროკურორმა და დედის მკვლელობაში ბრალდებული ირმა ყოჩიაშვილის ადვოკატმა სასამართლო უკომენტაროდ დატოვეს.

ცნობისათვის: 76 წლის ლუბა ყოჩიაშვილი 2016 წლის ოქტომბერში ჯერ მოკლეს, შემდეგ კი დაწვეს.

ე.წ. კანიბალიზმის საქმე დანაშაულიდან 2 კვირაში, 4 ნოემბერს გახსნილად გამოცხადდა. საქმეზე დააკავეს მოკლულის შვილი, 19 წლის ირმა ყოჩიაშვილი და მისი მეგობარი ბექა შენგელია, რომლებსაც ბრალი განსაკუთრებული სისასტიკით ჩადენილ მკვლელობაში ედებათ.

ფაქტთან დაკავშირებით დაკავებულია კიდევ ოთხი პირი, მათ შორის ერთი არასრულწლოვანი.

ნინო ექვთიმიშვილი