პოლიტიკა

ბელადი რასაც გიბრძანებს, ან რაც მისი კაპრიზია, ის კი არ არის მთავარი, როგორც ეს მიხეილ სააკაშვილს და მის გარემოცვას ჰგონია - გიგა ბოკერია

ნაციონალური მოძრაობიდან წამოსული გუნდის წევრის, გიგა ბოკერიას განცხადებით, სახელმწიფოს წინაშე დგას ორი ამოცანა. პირველი, მოხდეს ბიძინა ივანიშვილის ხელისუფლების დემონტაჟი, ხოლო მეორე, ქვეყნის წინაშე მდგომი პრობლემების გამკლავება.

ამის შესახებ ბოკერიამ იმ ბრიფინგზე განაცხადა, რომელზეც ოფიციალურად გახდა ცნობილი, რომ ნაციონალური მოძრაობიდან ე.წ ბოკერია-ბაქრაძის გუნდი გამოეყო.

„ჩვენი ქვეყნის წინაშე დგას ორი ძირითადი ურთიერთდაკავიშირებული ამოცანა: ერთი არის, დემოკრატიული გზით ბიძინა ივანიშვილის რეჟიმის დემონტაჟი, და მეორე, ამ გამარჯვების შემდეგ ჩვენი ქვეყნის წინაშე მდგომი ძალიან სერიოზული პრობლემებისადმი გამკვლავება“,- განაცხადა ბოკერიამ.

მისი თქმით, ამ ამოცანების გადაწყვეტას სჭირდება გუნდი, რომელსაც აქვს რწმენა, ნებისყოფა, კომპეტენეცია და ხედვა.

„ამ ამოცანების გადაჭრას სჭირდება გუნდი, რომელსაც ესმის, რომ ხელისუფლება, სახელმწიფო, უნდა იყოს ძლიერი და ეფექტური. ქვეყანა გარე მტრისგან დაიცვას, კრიმინალს თავი არ ააწევინოს, მოქალაქე მოძალადისგან დაიცვას. ამ ამოცანების გადაჭრას სჭირდება გუნდი, რომელსაც ესმის, რომ ბელადი რასაც გიბრძანებს, ან რაც მისი კაპრიზია, ის კი არ არის მთავარი, როგორც ეს დღეს, სამწუხაროდ, მიხეილ სააკაშვილს და მის დღევანდელ გარემოცვას ჰგონია, არამედ საკუთარი პოლიტიკური პრინციპები და ის, რაც ქვეყნისთვის მიგაჩნიათ სწორი - ეგ არის მთავარი“,-აღნიშნა ბოკერიამ.

მონიკა დავლიანიძე