პოლიტიკა

ბათუმში თურქეთის პრემიერ-მინისტრი ჩადის

თურქეთის პრემიერ-მინისტრი ბინალი ილდირიმი დღეს, ბათუმს ეწვევა.

მედიაში გავრცელებულ ამ ინფორმაციას, საქართველოში თურქეთის ელჩი ზექი ლევენთ გუმრუქჩუ ადასტურებს.

მისი თქმით, თურქეთის პრემიერს ქართველი კოლეგა სადილზე უმასპინძლებს.

„ჩვენს პრემიერ-მინისტრს აქვს თავისი პროგრამა ქალაქ ართვინში, რომელიც საქართველო-თურქეთის საზღვართან ახლოს მდებარეობს. ამ პროგრამის დასრულების შემდეგ, იგი სტამბოლში უნდა გაფრინდეს ბათუმიდან, ასე რომ, საზღვრიდან აეროპორტამდე მოკლე ტრანსფერი ექნება. საქართველოს პრემიერ-მინისტრმა გამოთქვა კეთილი სურვილი, ესარგებლა ამ შესაძლებლობით. ეს ჩვენი პრემიერ-მინისტრისთვისაც ძალიან დიდი პატივია. პრემიერ-მინისტრები ერთმანეთს საღამოს სადილზე შეხვდებიან“,-აღნიშნა ელჩმა მედიასთნ საუბარში.

მისი თქმით, ორი ქვეყნის პრემიერი შეხვედრაზე ისაუბრებს ყველა საინტერესო საკითხსზე.

„ყველა საინტერესო საკითხს შეეხებიან, თუმცა, როგორც გითხარით, ეს არ არის რაიმე ოფიციალური ან წინასწარ დაგეგმილი ვიზიტი და მხოლოდ შესაძლებლობის გამოყენებაა. ამიტომ, არ არსებობს რაიმე დღის წესრიგი ან საკითხთა ოფიციალური ჩამონათვალი. ისინი ისაუბრებენ ყველა თემაზე, რომელსაც ამ ეტაპზე საჭიროდ ჩათვლიან“, - განაცხადა თურქეთის ელჩმა

საქართველოს პრემიერი გიორგი კვირიკაშვილი კი, დღეს ბათუმში რაგბის სტადიონის გასახსნელად ჩადის.

მონიკა დავლიანიძე