პოლიტიკა

ბათუმში მომხდარი არეულობის გამო ირაკლი ჩხვირკიას დაკავებას ენმ არ ეთანხმება

„ერთიანი ნაციონალური მოძრაობა“ ბათუმის 11-12 მარტის მოვლენების შესაძლო ორგანიზებისთვის, მისი ყოფილი წევრის, ირაკლი ჩხვირკიას დაკავებას ეხმაურება.

განცხადების მიხედვით, ის ახლანდელი მთავრობის კრიტიკისთვის დაიჭირეს

„ივანიშვილის რეჟიმი აგრძელებს საქართველოს მოქალაქეების პოლიტიკურად მოტივირებულ დევნას, რისი კიდევ ერთი გამოვლინებაც არის ირაკლი ჩხვირკიას დაკავება ბათუმის მოვლენების ორგანიზების აბსურდული ბრალდებით. აშკარაა, რომ რეჟიმი რეპრესიების ახალი ტალღით ცდილობს საკუთარი უმძიმესი დანაშაულების გადაფარვას“, - ნათქვამია წერილში.

ენმ-ი აღნიშნავს, რომ „ხელისუფლების უმაღლესი თანამდებობის პირები პირველივე დღიდან ცდილობდნენ ამ მოვლენების პოლიტიზებასა და მათ გამოყენებას ოპოზიციის წინააღმდეგ“.

პარტიამ განაცხადა, რომ ყველანაირად მხარს დაუჭერს ირაკლი ჩხვირკიას.

გუშინ, ბათუმში 11-12 მარტის ღამით მომხდარი არეულობის ორგანიზების ბრალდებით, ირაკლი ჩხვირკია და მერაბ ღოღობერიძე დააკავეს. მათ ბრალს უყენებენ სსკ-ის 225-ე მუხლის პირველი ნაწილით, რაც ჯგუფური მოქმედების ორგანიზებას ან ხელმძღვანელობას, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმას გულისხმობს.

შეგახსენებთ, 11 მარტს ბათუმში „ბათუმი პლაზას“ მიმდებარე ტერიტორიაზე არასწორი პარკირების გამო მამა-შვილის დაჯარიმებასა და შემდგომში ადმინისტრაციული წესით დაკავებას პროტესტი მოჰყვა. აქციის მონაწილეები არაადეკვატურად მაღალ ჯარიმებს აპროტესტებდნენ, ასევე საპატრულო პოლიციის უფროსს ადგილობრივების მიმართ შეუწყნარებლობაში ადანაშაულებდნენ. აქცია შემდგომში არეულობაში გადაიზარდა.

ანა მებურიშვილი