სამართალი

ბათუმის საქალაქო სასამართლო მზია ამაღლობელის ადმინისტრაციულ საქმეს განიხილავს

ბათუმის საქალაქო სასამართლო „ბათუმელების“/„ნეტგაზეთის“ დამფუძნებლის და დირექტორის, მზია ამაღლობელის ადმინისტრაციულ საქმეს განიხილავს. მზია ამაღლობელი სხდომას დისტანციურად ესწრება.

შსს მზია ამაღლობელს 11 იანვარს აქციაზე პოლიციელის შეურაცხყოფას ედავება და წარმოება 173-ე მუხლით აქვს დაწყებული.

"პუბლიკის" ცნობით, ადვოკატები აცხადებენ, რომ მზია ამაღლობელის დაკავების ოქმი გაყალბებულია, რადგან ის არა პოლიციელის შეურაცხყოფისთვის, არამედ შენობაზე სტიკერის მიკვრის გამო დააკავეს და ამას ადასტურებს ვიდეო, რომელშიც ჩანს როგორც ამაღლობელის ქმედება, ასევე ბათუმის პოლიციის უფროსის, ირაკლი დგებუაძის ნათქვამი, რომ ამაღლობელი ასკ-ის 150-ე მუხლის დარღვევისთვისაა დაკავებული.

ადვოკატები აცხადებენ, რომ 150-ე მუხლი დაკავების საფუძველი არაა, სწორედ ამიტომ ჩაიწერა ოქმში 173-ე მუხლი, რომლითაც მზიას დაკავების საფუძველი შეიქმნა.

შეგახსენებთ, მზია ამაღლობელი ადმინისტრაციული დაკავებიდან მალევე ხელწერილის საფუძველზე გაათავისუფლეს, გათავისუფლებიდან რამდენიმე წუთში კი ირაკლი დგებუაძისთვის სილის გაწვნის გამო სისხლის სამართლის წესით დააკავეს. მას პოლიციელზე თავდასხმას ედავებიან და აღკვეთის ღონისძიების სახით პატიმრობა აქვს შეფარდებული.