სამართალი

ბათუმის 11-12 მარტის არეულობის გამო მერაბ ღოღობერიძესა და ირაკლი ჩხვირკიას 1.6-1.6 წლით პატიმრობა მიესაჯათ

18 ბათუმის 11-12 მარტის არეულობის ორგანიზების ბრალდებით დაკავებულ მერაბ ღოღობერიძესა და ირაკლი ჩხვირკიას 1.6-1.6 წლით თავისუფლების აღკვეთა მიესაჯათ. გადაწყვეტილება ბათუმის საქალაქო სასამართლოს მოსამართლემ დავით მამისეიშვილმა მიიღო.

მოსამართლემ საქმე გადააკვალიფიცირა და სსსკ-ის 225-ე მუხლით (მასობრივი არეულობის ორგანიზება) წარდგენილი ბრალი შეცვალა 226-ე მუხლით, რაც გულისხმობს ჯგუფური ქმედების ორგანიზებას, რასაც მოჰყვა საზოგადოებრივი წესრიგის დარღვევა.

როგორც მამისეიშვილმა განმარტა, მან ღოღობერიძეს სასჯელი შეუმსუბუქა იმის გამო, რომ ბრალდებული 4 შვილის მამაა.

„ჯგუფური ორგანიზება თქვენ და ღოღობერიძეს ნამდვილად არ ჩაგიდენიათ, დადასტურებული ფაქტია, რომ პირველის ნახევარზე, როცა აქციაზე დაიწყო დარბევა, არც ღოღობერიძე და არც ჩხვირკია არ იმყოფებოდნენ აქციაზე.

მე ვიზიარებ, რომ თქვენ ფიზიკური და მორალური ზიანი თქვენ გამო არ მიყენებია. მიმაჩნდა, რომ ღოღობერიძისთვის უფრო მეტი სასჯელი უნდა მიმესაჯა, ვიდრე თქვენთვის, მაგრამ მას აქვს შემამსუბუქებელი მდგომარეობა – ჰყავს ოთხი შვილი, ამიტომ მივიღე ასეთი გადაწყვეტილება“, - უთხრა ჩხვირკიას მოსამართლემ.

ღოღობერიძე პროცესზე არ გამოცხადებულა.

სასამართლოში ამ საქმის განხილვა 8 თვის განმავლობაში მიმდინარეობდა.

აქცია ბათუმში 11 მარტს დაიწყო, რომლის მიზეზად დემონსტრანტებმა საპატრულო პოლიციასა და მოქალაქეს შორის ინციდენტი დაასახელეს. პატრულმა მოქალაქე ჯერ არასწორი პარკირებისთვის დააჯარიმა, შემდეგ კი სიტყვიერი შეურაცხყოფისთვის დააკავა. დააკავეს მოქალაქის თანმხლები პირიც. თვითმხილველები ამბობდნენ, რომ პოლიციამ მოქალაქეს ფიზიკური შეურაცხყოფა მიაყენა და ამან გამოიწვია სპონტანური აქცია ადგილზე, რომელიც მოკლე ხანში ხალხმრავალი გახდა. აქციის მონაწილეებმა აჭარის პოლიციის მთავარი სამმართველოს უფროსის კახა ბუხრაძის გადადგომასა და დაკავებულების გათავისუფლებას ითხოვდნენ. შეკრება თითქმის მთელი ღამე გაგრძელდა, რომლის შედეგად დემონსტრანტებმა 7 ავტომობილი დაწვეს და ინფრასტრუქტურა დააზიანეს.

სისხლის სამართლის ბრალდებით 20-ზე მეტი პირი დააკავეს, დაახლოებით 19 ბრალდებულის მიმართ საპროცესო შეთანხმება გაფორმდა.