პოლიტიკა

ბატონ ქუმსიშვილს დათვლა შეეშალა - ზურაბ ჭიაბერაშვილი ფინანსთა მინისტრს პასუხობს

საპარლამენტო ფრაქცია „ევროპული საქართველოს“ წევრი ზურაბ ჭიაბერაშვილი გამოეხმაურა ფინანსთა მინისტრის დიმიტრი ქუმსიშვილის განცხადებას ფრაქციის მცირე და საშუალო ბიზნესის მხარდამჭერ პროგრამაზე. მინისტრის შეფასებით, ამ პროგრამის გამო 2018 წლის ბიუჯეტს მილიარდ-ნახევარი ლარი დააკლდება, ხოლო ამ თანხის ანაზღაურება საჯარო სექტორში დასაქმებულთა ხელფასების 80%-ით შემცირებითა და სოციალური დახმარებების ან პენსიების გაუქმებითაა შესაძლებელი.

ჭიაბერაშვილის განცხადებით, ფინანსთა მინისტრმა არასწორი თანხა დაასახელა, რადგან ბიუჯეტს არა მილიარდ-ნახევარი ლარი, არამედ მილიარდ 200 000 დააკლდება, რაც ანაზღაურდება მინისტრებისა და მაღალჩინოსნების ქამრების შემოჭერის პოლიტიკით.

„ჩვენ, გვინდა, ვუთხრათ საზოგადოებას, რომ ბატონ ქუმსიშვილს შეეშალა დათვლა. ჩვენი საგადასახადო ინიციატივები არ ითვალისწინებს მილიარდ ნახევრით ბიუჯეტის შემცირებას. დაახლოებით მილიარდ ორასი მილიონი იქნება ის თანხა, რაც შეიძლება ბიუჯეტს დააკლდეს, მაგრამ ეს რეზერვი ბიუჯეტში ნამდვილად არსებობს იქიდან გამომდინარე, რომ უკიდეგანოდ არის გაზრდილი ბიძინა ივანიშვილის მთავრობის მინისტრების, ჩინოვნიკების ხელფასები. ქუმსიშვილის პასუხი მიუთითებს ერთ რამეს, ის თავდაცვით პოზიციაშია. კატეგორიულად არ უნდა არც ქუმსიშვილს, არც ბატონ კვირიკაშვილს და არც სხვა მინისტრებს მოიკლონ საკუთარი კეთილდღეობა, პრემიები, დანამატები, ჩაწყობილი ტენდერები, კორუფციის შედეგად გაზრდილი პირადი სარგებელი და ამისათვის ისინი კვლავ ცდილობენ, რომ მძიმე გადასახადებით მოახრჩონ მცირე და საშუალო ბიზნესი“, - განაცხადა ჭიაბერაშვილმა.

ჭიაბერაშვილმა აღნიშნა, რომ „ევროპული საქართველოს“ ინიციატივა ითხოვს არა სოციალური ხარჯების, არამედ ბიუროკრატიული ხარჯების შეკვეცას.

ანა მებურიშვილი