სამართალი

ბანმა თხარა თხარაო, კობა გამოთხარაო - პაატა ბურჭულაძის კობა დავითაშვილის წინააღმდეგ საქმის არსებითი განხილვა 11 დეკემბერს ჩაინიშნა

საჯარო ცილისწამებისთვის პაატა ბურჭულაძემ კობა დავითაშვილს სასამართლოში უჩივლა. საქმის არსებითი განხილვა 11 დეკემბერს ჩაინიშნა. დღევანდელ სხდომაზე მხარეებმა მხოლოდ პოზიციები დააფიქსირეს და მტკიცებულებები წარადგინეს.

საქმე ეხება 17 ივლისს ერთ-ერთ ტელეკომპანიაში გასულ მასალას, სადაც დავითაშვილმა ბურჭულაძე ფონდ „იავნანას“ საქველმოქმედო თანხის მითვისებაში დაადანაშაულა.

ბურჭულაძემ დავითაშვილისგან განცხადების უარყოფა და მორალური ზიანის ასანაზღაურებლად 25 000 ლარის გადახდა მოითხოვა.

კობა დავითაშვილის განცხადებით, გაურკვეველია, რატომ აირჩია ბურჭულაძემ მოპასუხე მხარედ ის და არა ფონდის საქმიანობაზე გადაღებული ფილმის ავტორი.

„რატომ ჩათვალა ბატონმა პაატა ბურჭულაძემ, რომ კობა დავითაშვილია დაბალი ღობე და მას უნდა უჩივლოს, როდესაც ვახტანგ კომახიძე იმ ფილმების ავტორი, რომელსაც მეც ვეყრდნობი ჩემს განცხადებებში, რომელიც ადასტურებს, რომ ბატონმა პაატამ ბავშვების ფული მიითვისა, იხვეწება, რომ ბატონო პაატა, დავსხდეთ, ჩვენ გვქონდეს დებატები, მე მიჩივლეთ. ამის მიუხედავად, ბატონმა პაატამ ჩათვალა, რომ ამ საქმეზე მოპასუხე უნდა იყოს კობა დავითაშვილი. რა გაეწყობა, ბანმა თხარა თხარაო, კობა გამოთხარაო, ასეა მისი საქმე“,- განაცხადა დავითაშვილმა.