პოლიტიკა

ბალტიის სამი სახელმწიფოს ხელისუფლებებს აქვთ ინტერესი, რომ ვიყოთ იარაღი რუსეთის წინააღმდეგ - შალვა პაპუაშვილი

ყოფილი საბჭოთა რესპუბლიკების მიზანია კანონიერი ხელისუფლების შეცვლა, ვგულისხმობ ბალტიის ქვეყნებს, რომლებიც დღეს ევროკავშირის წევრები არიან. სამი ქვეყნის ხელისუფლებებს აქვთ ერთადერთი ინტერესი, რომ ჩვენ ვიყოთ იარაღი რუსეთის წინააღმდეგ, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

„მიზანი არის ნათელი, რაც ამ სამ ქვეყანას, მათ ხელისუფლებებს საქართველოს მიმართ აქვთ, არის კანონიერი ხელისუფლების შეცვლა და, როგორც ჩანს, სურვილია, მოვიდეს ისეთი ხელისუფლება საქართველოში, რომელიც ივლის მათ ჭკუაზე. უფრო სწორად, ის, ვინც მათ ხელმძღვანელობს იქით, მათ ჭკუაზე ივლის. მე ამაზე დავწერე კიდეც, რომ მიზანი სულ სხვა არის. ამ სამი ქვეყნის ხელისუფლებებს საქართველოს მიმართ აქვთ ერთადერთი ინტერესი. ეს ინტერესი მდგომარეობს იმაში, რომ ჩვენ ვიყოთ იარაღი და ინსტრუმენტი რუსეთის წინააღმდეგ. ამ სამ პოსტსაბჭოთა ქვეყანას აქვს თავისი შიშები რუსეთთან მიმართებით და იმის ნაცვლად, თამამად დადგნენ, ამ შიშებს გაუმკლავდნენ, თუ ბრძოლა უნდათ, იბრძოლონ, ცდილობენ, სხვა ქვეყნების ხელით აიცილონ ეს, ყურადღება გადაატანინონ რუსეთს სხვა საკითხებზე“, – განაცხადა შალვა პაპუაშვილმა.