სამართალი

ავთანდილ ხურციძემ გირაოთი გათავისუფლებაზე უარი თქვა

აშშ-ში დაკავებული ქართველი სპორტსმენის ავთანდილ ხურციძის სასამართლო პროცესი ნოემბრამდე გადაიდო.

ინფორმაციას საზოგადოებრივი მაუწყებელი ხურციძის მეგობარზე, მერაბ დვალიშვილზე დაყრდნობით ავრცელებს, რომელიც გუშინ ნიო იორკში გამართულ სასამართლო პროცესს ესწრებოდა.

მეგობრის ინფორმაციით, ავთანდილ ხურციძის პროცესი, კიდევ ორ ბრალდებულთან ერთად უნდა გამართულიყო. ეს პირები მოკრივის წინააღმდეგ აღძრულ ბრალდებებთან დაკავშირებულ რამდენიმე ეპიზოდში ფიგურირებენ. ერთი წარმოშობით ქართველი რუსეთის მოქალაქე, მეორე კი ამერიკაში მცხოვრები ქართველია.

მერაბ დვალიშვილს განმარტებით, საქმის განცალკევების გამო, მორიგი სასამართლო პროცესი ნოემბერში გაიმართება და ხურციძე ამ სხდომაზე ერთადერთი ბრალდებული იქნება.

რაც შეეხება ქართველი სპორტსმენის გირაოთი გათავისუფლებას, როგორც მისი მეგობარი ყვება, ხურციძემ გირაოზე თავად თქვა უარი და შესაბამისად მისი გათავისუფლების საკითხი აღარ განიხილება.

კითხვაზე რატომ გადაიფიქრა დაკავებულმა გირაოს გადახდა და თავმდები პირების დახმარება - სპორტსმენის მეგობარი პასუხობს, რომ ხურციძეს გარეთ ყოფნის შემთხვევაში, აშშ-ს საემიგრაციო სამსახურთან პრობლემები შეექმნებოდა.

ბრალდებულის მეგობარი ამბობს, რომ ქართველი მოკრივე სასამართლოს გადაწყვეტილებას დაელოდება, რადგან ის დარწმუნებულია, რომ გაამართლებენ.

ავთანდილ ხურციძე ნიუ იორკში, ე.წ. კანონიერი ქურდის, რაჟდენ შულაიას სინდიკატის წევრებთან ერთად დააკავეს.

ავთანდილ ხურციძეს რამდენიმე ბრალდება აქვს წაყენებული, მათ შორის რეკეტის, თავდასხმისა და რამდენიმე სახის თაღლითობის ბრალდებები.