პოლიტიკა

აუცილებელია გაიხსნას საპროკურორო საბჭოს სხდომა მედიისთვის - ოთარ კახიძე

„ევროპული საქართველოს“ წევრმა, ოთარ კახიძემ მიმართა იუსტიციის მინისტრ თეა წულუკიანს, რომ 11 ივლისისთვის დაგეგმილი საპროკურორო საბჭოს სხდომა, რომელზეც მთავარი პროკურორობის კანდიდატებს გაესაუბრებიან, მედიისთვის ღია იყოს.

„იმ ფონზე, როდესაც არსებობს სრული უნდობლობა პროცესის მიმართ, რომელსაც წარმართავს იუსტიციის მინისტრი თეა წულუკიანი, „ევროპული საქართველო“ მიიჩნევს, რომ აუცილებელია გაიხსნას საპროკურორო საბჭოს სხდომა მედიისთვის, რომ ჩვენმა საზოგადოებამ თავად იხილოს, თუ რა პროცესი გაიმართება სხდომაზე და რა კრიტერიუმებით აპირებს ხელისუფლება მთავარი პროკურორის შერჩევას. „ევროპული საქართველო“ აცნობიერებს, რომ ხელისუფლება ცდილობს თავისი კანდიდატის გაყვანას, მაგრამ მნიშვნელოვანია, რომ საზოგადოების წინაშე მოხდეს პროცესის დემონსტრირება.

როგორც საპროკურორო საბჭოს წევრი, მივმართავ საბჭოს თავმჯდომარეს, 11 ივლისის სხდომა იყოს ღია და გამჭვირვალე საზოგადოებისთვის“, -თქვა კახიძემ.

მთავარი პროკურორობის კანდიდატებად შალვა თადუმაძე, შალვა შავგულიძე და ნინო გოგნიაშვილი შეირჩნენ.