სამართალი

„აუდიტორია 115“ – ის წევრების სასამართლო სხდომა გადაიდო

„აუდიტორია 115“ – ის ადმინისტრაციული წესით დაკავებული წევრების საქმეზე სასამართლო პროცესი, რომელიც დღეს უნდა გამართულიყო, დაცვის მხარის შუამდგომლობის საფუძველზე 20 აპრილისთვის გადაიდო.

სხდომაზე ადვოკატებმა მასალების გაცნობის მიზნით, პროცესის გადადება მოითხოვეს.

საუბარია იმ მასალებზე, რომლებიც სამართალდამცველებმა სასამართლოს წარუდგინეს, მათ შორის დისკი, სადაც პარლამენტთან „აუდიტორია 115“- ის წევრების დაკავებაც არის ასახული.

გუშინ აქციაზე დაკავებულმა ხუთივე პირმა სასამართლო უკვე დატოვა. როგორც ბრალდებულები ამბობენ, კვლავ გააგრძელებენ ბრძოლას შრომითი უფლებებისთვის და ამ მიმართულებით ხელისუფლებას მათი მოთხოვნების შესრულებისკენ მოუწოდებენ.

„აუდიტორია 115“ – ის ხუთი წევრი გუშინ პარლამენტთან გამართულ აქციაზე ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს.

აუდიტორია 115-ის წევრები ტყიბულში, მინდელის შახტში მომხდარი ტრაგედიის დროს დაღუპულების ოჯახებს სოლიდარობას უცხადებდნენ და მომხადრზე პასუხისმგებლობას მთავრობას აკისრებდნენ. ისინი ხელისუფლების უმოქმედობას აპროტესტებდნენ და ვიცე-პრემიერის, დიმიტრი ქუმსიშვილის გადადგომას მოითხოვდნენ.