პოლიტიკა

აუდიტის სამსახური და მმართველი ხელისუფლება ცდილობენ ოპოზიციური პარტიების მომხრეთა დაშინებას - „ევროპული საქართველოს“ შემომწირველი

დღეს აუდიტის სამსახურში „ევროპული საქართველოსა“ და „ქართული ოცნების“ 14 შემომწირველი არის დაბარებული. აუდიტის სამსახურისთვის საეჭვო გახდა, რომ პარტიებისთვის გადაცემული თანხა აღემატება შემომწირველთა შემოსავალს.

უწყებაში უკვე მივიდა „ევროპული საქართველოს“ პოლიტსაბჭოს წევრი მარიამ რამინაშვილი. მისი ვარაუდით, აუდიტის სამსახური მმართველი გუნდის დავალებით ცდილობს, ოპოზიციური პარტიების შემომწირველები დააშინოს.

„ვფიქრობ, რომ ეს აქტივობა, რომელსაც ახორციელებს აუდიტის სამსახური და ზოგადად მმართველი ხელისუფლება, არის მიმართული ოპოზიციური პარტიების მომხრეთა დასაშინებლად ან დასაფრთხობად, თუმცა შემიძლია ერთმნიშვნელოვნად ვთქვა, რომ ამაოა ნებისმიერი მცდელობა, გამომდინარე იქედან, რომ თითოეულმა ჩვენგან კარგად ვიცით კანონით გათვალისწინებული ვალდებულებები, შესაბამისობები და გადაწყვეტილებები, რომელსაც ვიღებთ, ეს არის ნებაყოფლობითი“, - განაცხადა რამინაშვილმა.

კითხვაზე, რამდენად აღემატება შეწირული თანხა მის შემოსავალს, რამინაშვილმა უპასუხა, რომ მან პარტიას 5 ათასი ლარი გადაურიცხა, რაც მის დანაზოგს შეესაბამება.

„5 ათასი ლარია, რომელიც აბსოლუტურად შეესაბამება იმ დანაზოგს, რაც შეიძლება ნებისმიერმა მოქალაქემ განახორციელოს“,-განაცხადა რამინაშვილმა.

ანა მებურიშვილი