სამართალი

აუდიტის დასკვნა, რომელსაც ბრალდების მხარე ერთ-ერთ ცენტრალურ მტკიცებულებად მოიხსენიებს, არის ბლეფი - ბექა ბასილაია ე.წ. პიჯაკების საქმეზე

დღეს თბილისის საქალაქო სასამართლოში ე.წ. პიჯაკების საქმეს განიხილავენ, რომლის მიხედვით, საქართველოს ყოფილ პრეზიდენტ მიხეილ სააკაშვილსა და სახელმწიფო დაცვის სპეიალური სამსახურის ყოფილ ხელმძღვანელ თემურ ჯანაშიას ბრალად ედებათ 8 მილიონ ლარამდე საბიუჯეტო სახსრების არამიზნობრივი ხარჯვა.

საქმის პროკურორის, გიორგი მუჯირის ინფორმაციით, დღეს ბრალდების მხარე მტკიცებულების სახით, აუდიტის სამსახურის დასკვნას წარადგენს.

„დღეს ბრალდების მხარე გამოაქვეყნებს და გამოიკვლევს წერილობით მტკიცებულებებს, რომლებიც ადასტურებს სააკაშვილისა და ჯანაშიას ბრალდებას. მათ შორის გამოქვეყნდება და გამოკვლეული იქნება აუდიტის დასკვნა, სადაც ის დამატებითი ხარჯი, კერძოდ, ბრალად წარდგენილი 9 მილიონი ლარი შეფასებულია, როგორ უკანონო და დაუსაბუთებელი“, - განაცხადა პროკურორმა.

დაცვის მხარის თქმით, აუდიტის დასკვნა ბლეფია და ამ დოკუმენტს იურიდიული შინაარსი არ აქვს.

„იმ დოკუმენტებით, რაც საქმეშია წარმოდგენილი, კიდევ უფრო მკაფიოდ დასტურდება, რომ სრულიად ლეგალური, კანონთან შესაბამისი ხარჯების გაწევას ჰქონდა ადგილი და ასევე ადგილი აქვს შერჩევით მართლმსაჯულებას. იმიტომ, რომ ეს დოკუმენტები ცხადყოფს, რომ ამ ხარჯების გაწევა დაიწყო ოთარ ქველიძემ, დაასრულა ანზორ ჩუბინიძემ და ბრალდებულია თემურ ჯანაშია.

რაც შეეხება აუდიტის დასკვნას, რომელსაც ბრალდების მხარე მოიხსენიებს, როგორც მის ერთ-ერთ ცენტრალურ მტკიცებულებად. უნდა ვთქვათ, რომ ესაა ბლეფი, ჯერ ერთი, აუდიტის სამსახურის დასკვნა არის შსს-ის კონტრდაზვერვის დეპარტამენტში მივლინებულ პირთა კერძო მოსაზრებები. მეორე, ამ დასკვნას არ აქვს იურიდიული შინაარსი, რამდენადაც აუდიტორებს არ აქვთ უფლება შეაფასონ კონკრეტული ხარჯები, ისინი კანონის შესაბამისია თუ არა“, - განცხადა ადვოკატმა ბექა ბასილაიამ.

ანა მებურიშვილი