პოლიტიკა

აშშ-სა და საქართველოს შორის თავდაცვისა და უსაფრთხოების სამაგალითო თანამშრომლობა მომდევნო წლებში გაძლიერდება - დავით ზალკალიანი

აშშ-სა და საქართველოს შორის თავდაცვისა და უსაფრთხოების სამაგალითო თანამშრომლობა მომდევნო წლებში გაძლიერდება, - ამის შესახებ საქართველოს ვიცე-პრემიერი, საგარეო საქმეთა მინისტრი თავის ოფიციალურ Twitter-ის გვერდზე წერს.

„განსაკუთრებით ვაფასებთ აშშ-ს ურყევ მხარდაჭერას საქართველოს თავდაცვის შესაძლებლობებისადმი, ისევე როგორც ჩვენი თავდაცვისუნარიანობისა და ევროატლანტიკური ინტეგრაციის მიმართ“, - წერს დავით ზალკალიანი.

საგარეო საქმეთა სამინისტროს ინფორმაციით, დავით ზალკალიანი 4 მარტს, საქართველოს და აშშ-ის თავდაცვის მინისტრებს შორის შემდგარ სატელეფონო საუბარს გამოეხმაურა, რომლის დროსაც სტრატეგიული თანამშრომლობის მიმდინარე საკითხები და სამომავლო გეგმები იქნა განხილული.

მათივე ცნობით, აშშ-ს თავდაცვის მდივანმა, ოსტინ ლოიდმა Twitter-ს მეშვეობით აღნიშნა, რომ აშშ კვლავაც მტკიცედ უჭერს მხარს საქართველოს სუვერენიტეტს და ტერიტორიულ მთლიანობას, ხოლო აშშ-ის თავდაცვის სამინისტრო დიდად აფასებს საქართველოსთან სტრატეგიულ პარტნიორობას და უსაფრთხოების სფეროში საერთო მიზნების მიღწევის ერთგულია.