პოლიტიკა

არცერთ საკითხზე არც საქართველო ახდენს ზეწოლას თურქეთზე და არც თურქეთი საქართველოზე - თურქეთის ელჩი

თურქეთის ელჩის, ზექი ლევენთ გუმრუქჩუს განცხადებით, თურქეთი და საქართველო არცერთ საკითხზე ერთმანეთზე ზეწოლას არ ახდენენ.

გუმრუქჩუმ ასევე უპასუხა გავრცელებულ ინფორმაციას, რომ თურქეთის საელჩოს თხოვნით პარლამენტმა შეაჩერა კანონპროექტი 12 აგვისტოს - დიდგორობის უქმე დღედ გამოცხადების შესახებ. ელჩის თქმით, მიუხედავად საქართველოსა და თურქეთს შორის მჭიდრო თანამშრომლობისა, ყველა ქვეყანა გადაწყვეტილებას დამოუკიდებლად იღებს.

“ბევრ დეტალში არ შევალ, უბრალოდ, აღვნიშნავ, რომ თურქეთსა და საქართველოს შორის არსებული სტრატეგიული ურთიერთობები, მეგობრობა გვაძლევს იმის საფუძველს, რომ ყველა საკითხი ძალიან გულახდილად და დაუფარავად განვიხილოთ. მაგრამ არცერთ საკითხზე არც საქართველო ახდენს ზეწოლას თურქეთზე და არც თურქეთი საქართველოზე.

ძალიან ბევრ და ერთამენთისგან დამოუკიდებელ საკითხზე მიმდინარეობს კონსულტაციები სხვადასხვა უწყებასთან. ეს კონსულტაციები არის მჭიდრო, მაგრამ გადაწყვეტილებას ყველა ქვეყანა დამოუკიდებლად მიიღებს“, – განაცხადა გუმრუქჩუმ.

დიდგორობის უქმე დღედ გამოცხადების შესახებ კანონპროექტი 23 მარტს პარლამენტმა პირველი მოსმენით მხარი დაუჭირა, რის შემდეგ მისი განხილვა შეწყდა. კანონპროექტის ავტორის, ნუკრი ქანთარიას თქმით, ეს ორი მიზეზითაა განპირობებული - იმით, რომ კანონპროექტის ინიციატორები კონსულტაციას გამართავენ ისტორიკოსებთან და თურქეთის საელჩოს თხოვნით.