სამართალი

არსებობს რეალური სამართლებრივი საფუძველი იმისა, რომ მოხდეს ლევან ყიფიანის სამართლებრივი პასუხისმგებლობის გამოკვეთა - გიორგი ფანცულაია

,,ომეგა ჯგუფისა“ და იბერია ტვ-ის ადვოკატი გიორგი ფანცულაია მიიჩნევს, რომ ლევან ყიფიანი არის ერთ-ერთი უმნიშვნელო ფიგურა კომპანიაზე ზეწოლის საქმეში.

მისი თქმით, მნიშვნელოვანია, ყიფიანის გამოკითხვის შემდეგ, გამოიკვეთოს ის ადამიანები, ვის დავალებასაც ასრულებდა სპორტის ყოფილი მინისტრი.

ადვოკატი ფიქრობს, რომ არსებობს ყველანაირი საფუძველი, რათა ლევან ყიფიანთან მიმართებაში მოხდეს მისი სამართლებრივი პასუხისმგებლობის საკითხის დაყენებაც.

,,დღემდე რომ ლევან ყიფიანის დაკითხვა არ მოხდა ამ ფაქტთან დაკავშირებით, მაქვს ვარაუდი, რომ მას აძლევენ გარკვეულ დროს, რათა მის უკან მყოფ რეალურ ფიგურანტებთან დაალაგოს ეს ურთიერთობები.

არსებობს რეალური სამართლებრივი საფუძველი იმისა, რომ როცა მოხდება ლევან ყიფიანის დაკითხვა, მოხდეს თვით ლევან ყიფიანის სამართლებრივი პასუხისმგებლობის გამოკვეთა.

ჩვენთვის ძალიან მნიშვნელოვანია, რომ გამოძიება ჩატარდეს სრულად და ობიექტურად. აქედან გამომდინარე, ლევან ყიფიანით ეს საქმე არც იწყება და არც მთავრდება“, - აცხადებს ადვოკატი.

ცნობისთვის, იბერია ტვ-სა და ომეგა ჯგუფზე განხორციელებულ შესაძლო ზეწოლის საქმეზე გამოსაკითხად სპორტის ყოფილი მინისტრი, ლევან ყიფიანი პროკურატურაში 17 სექტემბერს არის დაბარებული.