პოლიტიკა

არის დაპირებები, რომელთა შესრულების არავითარი რესურსი არ აქვს მომავალ პრეზიდენტს სხვადასხვა მიზეზის გამო - ირაკლი კობახიძე

ჩვენ აღვკვეთეთ არჩევნების გაყალბების პრაქტიკა ჩვენს ქვეყანაში და შესაბამისად და ეს მიზანი გვაქვს დასახული ამ საპრეზიდენტო არჩევნების პირობებშიც, - განაცხადა პარლამენტის თავმჯდომარემ, ირაკლი კობახიძემ მიმდინარე საარჩევნო პროცესების თაობაზე გამართულ ბრიფინგზე.

მისი თქმით, ,,ქართულმა ოცნებამ“ ოპონენტებს ევროპული სტილის არჩევნების ჩატარება შესთავაზა.

,,ეს იყო შეთავაზება ასევე, ჩვენ მიერ მხარდაჭერილი კანდიდატის, ქალბატონი სალომე ზურაბიშვილის. სწორედ ასეთი სახით ტარდება ჩვენი მხრიდან ევროპული სტილის წინასაარჩევნო კამპანია, თუმცა, პასუხად ვიღებთ სხვა რამეს ოპონეტებისგან. მათი პასუხი არის ძალიან შორს ევროპული, დასავლური პოლიტიკური და საარჩევნო კულტურისგან“, - განაცხადა კობახიძემ და ის პუნქტები ჩამოთვალა, რომელიც მისი თქმით, წარმოადგენს წინაარჩევნო პროცესში დაფიქსირებულ დარღვევებს.

,,ეს არის პირველ რიგში, ჩვენ მიერ მხარდაჭერილი საპრეზიდენტო კანდიდატის შეურაცხყოფა სხვადასხვა ფორმით, აბსოლუტურად მიუღებელი ფორმით. ასეთი ფორმით ადგება შეურაცხყოფა ქალბატონ სალომე ზურაბიშვილს.

მეორე მნიშვნელოვანი გადაცდომა - ეს არის კანდიდატის მხარდამჭერებზე ფსიქოლოგიური ზეწოლის მცდელობა. ეს მცდელობა არ არის წარმატებული, გამომდინარე იქიდან, რომ ქალბატონი სალომე ზურაბიშვილის კამპანიაში არიან ძალიან ფართოდ ჩართული ჩვენი საზოგადოების წარმომადგენლები, მათ შორის ჩვენი საზოგადოების თვალსაჩინო წარმომადგენლები.

მესამე - ეს არის დესტრუქცია, რომელსაც ჩვენ ვხედავთ აბსოლუტურად ყველა შეხვედრაზე, რომელიც იმართება ჩვენი კანდიდატის მიერ და ეს არის განსაკუთრებულად შემაშფოთებელი მოვლენა.

შემდეგი ეს არის აბსოლუტურად პოპულისტური და ცრუ დაპირებები, რომელსაც გასცემენ ოპოზიციური კანდიდატები. შეგახსენებთ დაპირებას პენსიის თაობაზე. არის დაპირებები, რომელთა შესრულების არავითარი რესურსი არ აქვს მომავალ პრეზიდენტს სხვადასხვა მიზეზის გამო. ეს პოპულიზმიც არის ამ კამპანიის შემადგენელი ნაწილი.

ასევე, კიდევ ერთი დარღვევა მდგომარეობს იმაში, რომ ფიქტიური პარტიების მიერ ხდება უფასო საეთერო დროის და საბიუჯეტო სახსრების მიტაცება, საუბარია მილიონობით ლარზე.

და ბოლოს, ტოტალური პროპაგანდა, რომელსაც აწარმოებს პარტიული ტელევიზია, ეს არის კიდევ ერთი დარღვევა, რომელიც კიდევ ცალკე უნდა გამოიყოს.

ჩვენ, ყველა ამ დარღვევასთან დაკავშირებით მივაწვდით სრულ ინფორმაციას ჩვენს საერთაშორისო პარტნიორებს“, - განაცხადა ირაკლი კობახიძემ.