პოლიტიკა

არჩილ ტატუნაშვილის ტრაგიკული გარდაცვალება და კიდევ ორი მოქალაქის დაკავება კონფლიქტის სამწუხარო შეხსენებაა - დონალდ ტუსკი

ევროკავშირის საბჭოს პრეზიდენტმა დონალდ ტუსკმა საქართველოს პრეზიდენტთან გიორგი მარგველაშვილთან ერთობლივი პრესკონფერენცია გამართა. მან თქვა, რომ საქართველოსა და ევროკავშირს შორის პარტნიორობა შესანიშნავია.

„თქვენ იცით, როგორ ვაფასებთ თქვენს ვიზიტს. ჩვენი თანამშრომლობა, თანამშრომლობა საქართველოსა და ევროკავშირს შორის შესანიშნავი და ეფექტურია. ვიზალიბერალიზაცია და ვაჭრობის მოცულობის ზრდა ამის დამადასტურებელია. ასოცირების ხელშეკრულების იმპლემენტაციამ ხელშესახები შედეგები მოიტანა“, - განაცხადა ტუსკმა.

ტუსკმა აღნიშნა, რომ ევროკავშირი აგრძელებს საქართველოში მიმდინარე რეფორმების მხარდაჭერას. ის გამოეხმაურა არჩილ ტატუნაშვილის დაღუპვის ფაქტს.

„ჩვენ განვიხილეთ საქართველო-ევროკავშირის ურთიერთობების მომავალი. ევროკავშირი მხარს უჭერს საქართველოს იმ რეფორმებში, რომელიც ქვეყანაში ხორციელდება. ჩვენ ასევე შევეხეთ საქართველოს ორ რეგიონში, აფხაზეთსა და სამხრეთ ოსეთში მიმდინარე მცოცავ ოკუპაციას. საქართველოს მოქალაქის, არჩილ ტატუნაშვილის ტრაგიკული გარდაცვალება და კიდევ ორი მოქალაქის დაკავება კონფლიქტის სამწუხარო შეხსენებაა“, - თქვა ტუსკმა.