პოლიტიკა

არჩილ ტატუნაშვილის საქმე იქნება განხილული მანამ, სანამ არ აღდგება მართლმსაჯულება - დღეს ჟენევის მოლაპარაკებები იწყება

დღეს ჟენევის საერთაშორისო მოლაპარაკებები იწყება. ქართულ დელეგაციას საგარეო საქმეთა მინისტრის მოადგილე, დავით დონდუა ხელმძღვანელობს.

ქართულმა მხარემ გამორიცხა რუსეთის საგარეო საქმეთა მინისტრის მოადგილის, გრიგორი კარასინის განცხადება ჟენევის ფორმატის შესაძლო შეცვლის შესახებ.

ამჯერად მხარეები ძალის გამოუყენებლობის ტექსტზე ისევ იმსჯელებენ, რადგან წინა შეხვედრაზე შეთანხმება ვერ შედგა. გარდა ამისა, ქართული მხარე დღის წესრიგში დააყენებს არჩილ ტატუნაშვილის მკვლელობის საქმეს.

„პროგრესი ცეცხლის შეწყვეტის შეთანხმების შესრულებასთან დაკავშირებით არ გვაქვს. არ გვაქვს იმიტომ, რომ რუსეთი კვლავ აგრძელებს საქართველოს ტერიტორიების ოკუპაციას, ამიტომ ამ რაუნდზე განსაკუთრებული ყურადღება დაეთმობა იმას, რომ ცეცხლის შეწყვეტის შეთანხმება უნდა შესრულდეს. ასევე არჩილ ტატუნაშვილის საქმე. ეს საკითხი იქნება განხილული მანამ, სანამ არ აღდგება მართლმსაჯულება, სანამ არ დაისჯებიან ის პირები, რომლებიც დამნაშავეები არიან“, - თქვა დონდუამ.