პოლიტიკა

არჩილ ტატუნაშვილის საკითხზე რუსეთისა და ცხინვალის წარმომადგენლებისგან სრულიად აბსურდული განცხადებები მოვისმინეთ - დავით დონდუა

ჟენევის მოლაპარაკებების მონაწილეებმა დახურულ კარს მიღმა ძალის არგამოყენების შესახებ ერთობლივ განცხადებაზე იმსჯელეს. როგორც ქართული დელეგაციის ხელმძღვანელმა, საგარეო საქმეთა მინისტრის მოადგილემ, დავით დონდუამ ჟურნალისტებს განუცხადა, რუსეთისა და საოკუპაციო რეჟიმების წარმომადგენლებმა პროვოკაციული განცხადებები გააკეთეს, რაც დისკუსიის ჩაშლისკენ იყო მიმართული.

„რუსეთის და საოკუპაციო რეჟიმის წარმომადგენლებმა შეთანხმებულად გააკეთეს ისეთი პროვოკაციული განცხადებები, რაც აშკარად მიანიშნებს იმას, რომ ისინი არ არიან მზად, წამოვიდნენ კონსტრუქციულ დიალოგზე და შეგნებულად აპირებენ ამ მოლაპარაკებების არასწორი მიმართულებით წაყვანას და საბოლოოდ ჩაშლას. თუმცა საბოლოოზე ჯერ ნუ ვილაპარაკებთ, იმიტომ რომ მთავარი განხილვები იქნება ნაშუადღევს, მაგრამ ის, რაც მოხდა დღისით, უკვე მიანიშნებს, იმაზე, რომ თუ ვინმე იყო კუთხეში მომწყვდეული, ეს არა ჩვენ არამედ რუსეთის იყო“, -თქვა დონდუამ.

რაც შეეხება არჩილ ტატუნაშვილის მკვლელობის საკითხს, დონდუას თქმით, რუსეთისა და საოკუპაციო რეჟიმის წარმომადგენლებისგან მან აბსურდული განცხადებები მოისმინა.

„მთავარი აქცენტი გავაკეთეთ ტატუნაშვილის საქმეზე, რაზეც სამწუხაროდ, თუმცა როგორც მოსალოდნელი იყო, ვერაფერი შინაარსიანი ვერ მოვისმინეთ და ვერ გავიგეთ ვერც რუსეთის, ვერც ცხინვალის წარმომადგენლებისაგან. ცხინვალის წარმომადგენლებმა იგივე განცხადება წაიკითხეს, რასაც თავის დროზე აკეთებდნენ, სრულიად აბსურდულს. ჩვენ ვამტკიცებთ იმას, რომ მოხდა მკვლელობა, მოხდა ადამიანის სიცოცხლის ხელყოფა, რომელიც იყო უკანონოდ დაკავებული. ახლა ჩვენთან მიმდინარეობს გამოძიება, რომელიც უნდა დასრულდეს და არავინ ხელი არ უნდა შეუშალოს მის დასრულებას, მაგრამ ერთი ფაქტია, რომ ადამიანი არის ნაწამები და ახლა უნდა მოხდეს ამის გამოძიება და ის ვინც არის დამნაშავე, ის უნდა წარდგეს სასამართლოს წინაშე,“ - განაცხადა დონდუამ.

საქართველოს საგარეო საქმეთა მინისტრის მოადგილის განცხადებით, არჩილ ტატუნაშვილის მკვლელობის საქმეზე პოლიტიკური პასუხისმგებლობა რუსეთის ფედერაციამ უნდა აიღოს.