პოლიტიკა

არჩილ ტატუნაშვილის ოჯახი დაღუპულის ცხედრის გადმოსასვენებლად გიორგი გახარიას 48 საათს აძლევს

ოკუპირებული ცხინვალის რეგიონში დაღუპული არჩილ ტატუნაშვილის ოჯახი შინაგან საქმეთა მინისტრს, გიორგი გახარიას 48 საათს აძლევს თბილისის კონტროლირებად ტერიტორიაზე ცხედრის გადმოსასვენებლად. ტატუნაშვილის მამის, გიორგი ტატუნაშვილის განცხადებით, წინააღმდეგ შემთხვევაში მოსახლეობა გზას გადაკეტავს და არცერთ რუსულნომერიან მანქანას არ გაატარებს.

ტატუაშვილის მამის თქმით, მან იცის, როგორ დააკავეს მისი შვილი.

,,ხელბორკილები დაადეს. დაბორკილმა გაუწია წინააღმდეგობა. ფიზიკურად ძლიერი იყო, არ ემორჩილებოდა და მოკლეს. ჩემი ერთადერთი ნატვრა ისღაა, რომ დედას ცხედარი დაუბრუნონ, რომ დაიტიროს როგორც წესია.

ველოდები, თუ არადა არცერთი რუსეთის მანქანა აღარ გაივლის“,- განაცხადა ტატუნაშვილმა.

გიორგი ტატუნაშვილის შეფასებით, საოკუპაციო ძალები ცხედრის გადაცემას გამიზნულად აჭიანურებენ.

„ნაწამებია, ნატანჯია და ამის გამო აჭიანურებენ, რომ ეს არ გახმაურდეს, რომ წამებით მოკლეს ჩემი შვილი“, -თქვა დაღუპულის მამამ.

გიორგი ტატუნაშვლის ინფორმაციით, ვერ ხერხდება არჩილ ტატუნაშვილთან ერთად გატაცებულ ორ მოქალაქესთან: ლევან ქუტაშვილთან და იოსებ პავლიაშვილთან დაკავშირება.

22 თებერვალს საოკუპაციო ძალებმა საქართველოს სამი მოქალაქე: არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. მომდევნო დღეს ოსურმა მედიამ გაავრცელა ინფორმაცია ტატუნაშვილის სიკვდილის შესახებ.