პოლიტიკა

არჩილ ტატუნაშვილის დაღუპვასთან დაკავშირებით საპარლამენტო უმრავლესობა რეზოლუციის ინიცირებას გეგმავს

ოკუპირებული ცხინვალის რეგიონში არჩილ ტატუნაშვილის დაღუპვასთან დაკავშირებით საპარლამენტო უმრავლესობა რეზოლუციის ინიცირებას გეგმავს. ამის შესახებ უმრავლესობის ლიდერმა, არჩილ თალაკვაძემ განაცხადა.

დეპუტატის განმარტებით, უმრავლესობა რეზოლუციით მოითხოვს საერთაშორისო გამოძიების ჩატარებას.

„მოხდა ადამიანის თავისუფლებისა და სიცოცხლის ხელყოფა. საპარლამენტო უმრავლესობა ვაპირებთ, რომ ინიცირება გავუკეთოთ არჩილ ტატუნაშვილის გარდაცვალებასთან დაკავშირებით სპეციალურ რეზოლუციას, სადაც საერთაშორისო გამოძიების ჩატარებას მოვითხოვთ. ვინაიდან, ყველა საერთაშორისო და ადგილობრივ ანგარიშში ნათლად ჩანს, რომ ოკუპირებულ ტერიტორიებზე ადამიანის უფლებათა დარღვევების რისკი და საფრთხეები არის მაღალი და დროა , საერთაშორისო საზოგადოებამ მეტი მობილიზება მოახდინოს ოკუპირებულ ტერიტორიებზე მონიტორინგის თვალსაზრისით. მოვითხოვთ ასევე რუსეთის ფედერაციისგან, რომ ტერიტორიაზე საერთაშორისო დამკვირვებლები დაუშვას“, -თქვა თალაკვაძემ.

თალაკვაძის განმარტებით, ტატუნაშვილის გარდაცვალების შესახებ რეზოლუციაზე განცხადებას დღეს, ბიუროს სხდომაზე გააკეთებს, ხუთშაბათს მოხდება მისი დარეგისტრირება და მომავალ კვირაში პარლამენტი შეეცდება სხდომაზე, ერთი მოსმენით უყაროს კენჭი.